ހުސްވި ޖޫންމަހުގެ 2 ވަނަ ދުވަހު ސިފައިންގެ ތަމްރީނެއް ކުރިޔަށް ގެންދަނިކޮށް، މިޔަރެއް ހަމަލާދިނުމުގެ ސަބަބުން ލިބުނު ޒަޚަމްތަކާއި ގުޅިގެން ނިޔާވި، އެމްއެންޑީއެފްގެ ކޯޕްރަލް، މުޙައްމަދު ޒައިދާންގެ މަހާނައަށް، އޭނާއަާއެކު ޓްރޭނިންގ ހަދަމުން ދިޔަ އެހެން އޮފިސަރުން ޒިޔާރަތްކޮށްފިއެވެ.

ޒައިދާނާއިއެކު  ޓްރޭނިންގ ހަދަމުން ދިޔަ ބެޗުގައި ހިމެނޭ ސިފައިންގެ އޮފިސަރުން މިއަދު ވަނީ އުނގޫފާރަށް ގޮސް، އުނގޫފާރު ގަބުރުސްތާނުގައި އޮތް ޒައިދާންގެ މަހާނައަށް ޒިޔާރަތްކޮށް، އޭނާގެ މައްޗަށް ދުޢާކޮށް، އަދި އެ މަހާނައިގެ ވިނަ ނޮޅާފައެވެ.

މީގެ އިތުރުން ޒައިދާނާއިއެކު ޓްރޭނިންގ ހަދަމުން ދިޔަ ބެޗުގައި ހިމެނޭ ސިފައިންގެ އޮފިސަރުންނާއި، އެޓްރޭނިންގެ މުދައްރިބުން ވަނީ، ޒައިދާންގެ އާއިލާ ގާތަށްވެސް ޒިޔާރަތްކޮށްފައެވެ. އުނގޫފާރުން މައުލޫމާތު ލިބުނު ގޮތުގައި ޒައިދާނާއިއެކު ޓްރޭނިންގ ހަދަމުން ދިޔަ ބެޗުގައި ހިމެނޭ ސިފައިންގެ އޮފިސަރުން އުނގޫފާރުގައި ހޭދަކޮށްފައި ވަނީ ދޮޅުގަޑިއެއްހައި އިރެވެ.

ސިފައިންގެ ސްޕެޝަލް ޕްރޮޓެކްޝަން ގްރޫޕުގައި މަސައްކަތް ކުރަމުންދިޔަ، ރ. އުނގޫފާރު ނިއުލައިފް، މުހައްމަދު ޒައިދާން (23އ)، ނިޔާވީ، ޖޫން 2 ވަނަ ދުވަހު މިޔަރެއްގެ ހަމަލާގައި ލިބުނު ޒަޚަމްތަކާއި ގުޅިގެންނެވެ. ރަސްމީ އިއްޒަތުގައި އުނގޫފާރު ގަބުރުސްތާނުގައި ޒައިދާންގެ ހަށިގަނޑު ވަޅުލާފައި ވަނީ، ޖޫން 3 ވަނަ ދުވަހުގައެވެ.

ޒައިދާންގެ މަރުގެ ހާދިސާ އާއި ގުޅިގެން އެމްއެންޑީއެފްގެ މައްޗަށް އިހުމާލުވުމުގެ ތުހުމަތުތައް ކުރެވުނު ނަމަވެސް އެކަމާއި ގުޅިގެން އެމްއެންޑީއެފުން އެއްވެސް ވާހަކައެއް ދައްކާފައެއް ނުވެއެވެ. އަދި އެހާދިސާ ހިނގައި ދިޔަގޮތް ސިއްރުކޮށްފައި އޮތް އިރު، އެހާދިސާ އާއި ގުޅިގެން ބަލަންޖެހޭ ކަންކަން ބަލަމުންދާކަމަށް ބުނުން ފިޔަވައި އެމްއެންޑީއެފުން އެއްވެސް އެއްޗެއް ބުނެފައެއް ނުވެއެވެ.

ޒައިދާން ނިޔާވި އިރު އޭނާ ދިވެހި ސިފައިންގެ ތެރޭގައި ޚިދުމަތް ކުރަންފެށިތާ 4 އަހަރާއި 11 މަހާއި 13 ދުވަސް ވަނީ ވެފައެވެ.