މިޔަރުގެ މަސްވެރިކަން އަލުން ހުއްދަ ކުރުމަށް ސަރުކާރުން މަސައްކަތް ކުރަމުންދާ ކަމަށް ބުނެ ފަތުރާ ވާހަކަތައް ފިޝަރީޒް މިނިސްޓްރީން ދޮގުކޮށްފިއެވެ.

އެމިނިސްޓްރީގެ އިސްބޭފުޅަކު ވިދާޅުވީ، މިޔަރުގެ މަސްވެރިކަމަށް ހުއްދަދިނުމަށް ނިންމުމާައި ގުޅޭ ގޮތުން މިހާތަނަށް އެމިނިސްޓްރީ އެއްވެސް ނިންމުމެއް ނިންމާފައި ނުވާކަމަށެވެ. އެހެން ނަމަވެސް މީގެ ކުރިންވެސް ފިޝަރީޒް މިނިސްޓަރ އަޙްމަދު ޝިޔާމް މުހައްމަދު ވިދާޅުވެފައިވާ ފަދައި އެފަދަ ނިންމުމެއް ނިންމާނަމަ އެކަމުގައި ގުޅުން ހުރިހާ ފަރާތްތަކާއި މަޝްވަރާ ކުރާނެއެވެ.

އެމްއެންޑީއެފްގެ ޓްރެއިނިންގައި އުޅުނު އޮފިސަރެއްގެ ގައިގައި މިޔަރެއް ދަތްއެޅުމުގެ ސަބަބުން ލިބުނު ޒަޚަމްތަކާއި ގުޅިގެން މިދިޔަ މަހުގެ 2 ވަނަ ދުވަހު އޭނާ ނިޔާވެފައި ވާއިރު، އެ ހާދިސާ އާއި ގުޅިގެން، މިޔަރުގެ މަސްވެރިކަން ހުއްދަ ކުރުމަށް ގިނަ ބަޔަކު ގޮވާލާފައިވެއެވެ.

ތިމާވެށީގެ ދާއިރާގައި މަސައްކަތްކުރައްވާ އިސްބޭފުޅަކު ވިދާޅުވީ، ކުރިން މިޔަރު އުރަހާއި މިޔަރުގެ މަސްވެރިކަމުގެ ވިޔަފާރި ކުރަމުން އައި ބައެއް ފަރާތްތަކުން، އަލުން މިޔަރުގެ މަސްވެރިކަން ހުއްދަކުރުމަށް ސަރުކާރަށް ބާރުއަޅަމުންދާ ކަމަށެވެ. އެހެން ނަމަވެސް ރާއްޖޭގައި މިޔަރުގެ މަސްވެރިކަން ފަށައިފިނަމަ އެކަމުގެ ސަބަބުން ފަތުރުވެރިކަމަށާއި، ދޮށީގެ މަސްވެރިކަމަށްވެސް ނޭދެވޭ އަސަރުތައް ކުރާނޭކަން ފާހަގަވާތީ، މިޔަރުގެ މަސްވެރިކަމަސް އަލުން ހުއްދަ ދިނުމާއި މެދު ސަރުކާރުން މިހާތަނަށް ގޮތެއް ނިންމާފައެއް ނުވެއެވެ.

މިޔަރަކީ އުމުރު ދިގު އަދި ލަހުން ވިހައި އާލާވާ އެއްޗަކަށް ވާތީ، ދުނިޔޭގެ ގިނަ ޤައުމުތަކުގައި މިޔަރުގެ އާބާދީ ވަނީ ހިމާޔަތްކޮށްފައެވެ. ރާއްޖޭގައި މިޔަރުގެ މަސްވެރިކަން މުޅިން މަނާކުރީ، އެމްޑީޕީގެ ފުރަތަމަ ވެރިކަމުގައި 2010 ވަނަ އަހަރުގައެވެ.