ރާއްޖޭގެ އާބާދީގައި ހިމެނޭ ކޮންމެ 10 މީހެއްގެ ތެރެއިން ދެމީހަކީ، ޓައިޕް 2 ހަކުރުބަލި ހުންނަ މީހުންކަމުގައި ފަސްޓްލޭޑި ސާޖިދާ މުހައްމަދު ވިދާޅުވެއްޖެއެވެ. އެކަމަނާ މިހެން ވިދާޅުވީ، ޑައިބެޓީސް ސޮސައިޓީ އޮފް މޯލްޑިވްސްގެ 24 ވަނަ އަހަރީ ދުވަސް ފާހަގަކުރުމަަށް ބޭއްވި ޖަލްސާގައި ދެއްކެވި ވާހަކަފުޅުގައެވެ.

ފަސްޓްލޭޑި ސާޖިދާ މުޙައްމަދު ވިދާޅުވީ، ހަކުރުބަލިން ސަލާމަތްވެ ތިބުމަށްޓަކައި، ކޮންމެ މީހަކީ މި ބައްޔާމެދު އަމިއްލައަށް މަޢުލޫމާތު ހޯދާ މީހަކަށްވުމާ، ލިބޭ މަޢުލޫމާތާ އެއްގޮތަށް ދިރިއުޅުމުގެ އާދަތައް ބަދަލުކޮށް އިސްލާޙްކުރުމާ، ހަކުރުބަލި ތަޙައްމަލުކުރަން ޖެހިފައިވާނަމަ ފަރުވާހޯދައި، އަމިއްލަ ހަށިގަނޑަށް ފަރުވާތެރިކަމާއި ސަމާލުކަން ދޭ މީހަކަށް ވާންޖެހޭ ކަމަށެވެ.

ފަސްޓްލޭޑީ ސާޖިދާ މުޙައްމަދު ވިދާޅުވީ، ހަކުރު ބަލީގެ ޝިކާރައަކަށް ނުވެ ހުރެވޭތޯ ކޮންމެ މީހަކުވެސް ވަރަށް މަސައްކަތް ކުރަން ޖެހޭ ކަމަށެވެ. 

ޑައިބެޓީސް ސޮސައިޓީ އޮފް މޯލްޑިވްސްގެ 24 ވަނަ އަހަރީ ދުވަހުގެ ޙަފްލާގައި، ރާއްޖޭގައި ހަކުރުބައްޔަށް ސްކްރީން ކުރުމަށް ، އެ އެސޯސިއޭޝަނުން ކުރިޔަށްގެންދިޔަ ޕްރޮގްރާމުން ލިބިފައިވާ މަޢުލޫމާތުތަކުގެ މައްޗަށް ބިނާކޮށް ތައްޔާރުކޮށްފައިވާ ތަފާސް ހިސާބު ފޮތް ފަސްޓް ލޭޑީ ސާޖިދާ މުޙައްމަދު ނެރެ ދެއްވިއެވެ.