އަދަބިއްޔާތާއި މުނިފޫހި ފިލުމުގެ ދާއިރާއިން ގިނަ ޚިދުމަތްތަކެއް ކޮށްދެއްވި، އަޙްމަދު ޝާހިދު ޙަލީމް ދެމިއޮތުމުގެ ޢާލަމަށް ދަތުރުކުރައްވައިފިއެވެ.

އަޙްމަދު ޝާހިދު ދެމިއޮތުމުގެ ޢާލަމަށް ދަތުރުކުރެއްވީ އިރު އައިޖީއެމް ހޮސްޕިޓަލްގައި އޭނާއަށް އައީ ފަރުވާ ދެމުންނެވެ. އަޙްމަދު ޝާހިދުގެ ދަރިކަލުން އަދި ޓީވީ ޕްރެޒެންޓަރ މޫސާ ރިޟުވާން ވިދާޅުވެފައިވާ ގޮތުގައި، އަޙްމަދު ޝާހިދު ދެމިއޮތުމުގެ ޢާލަމަށް ދަތުރުކުރެއްވީ މިއަދު ހެނދުނުއެވެ. އަދި ޝާހިދަށް ހޮސްޕިޓަލްގައި އެޑްމިޓްކޮށް ފަރުވާދެމުން އަންނަތާ މަހަކަށްވުރެ ގިނަ ދުވަސް ވަނީ ވެފައެވެ.

އަޙްމަދު ޝާހިދު ޙަލީމް ބޮޑަށް މަޝްހޫރުވެފައި ވަނީ، ކޮމެޑީ އެކްޓަރެއްގެ ގޮތުގައެވެ. ތަމްސީލްތަކާއި ޑްރާމާތަކުގައި އަދި ޓީވީ ޝޯވތަކުގައި އޭނާ މުހިއްމު ދައުރެއް އަދާކުރައްވާފައިވެއެވެ. ޚާއްސަކޮށް ޓީވީއެމްގެ އެންމެ ކުރީގެ ޕްރޮގްރާމްތަކުގެ ތެރޭގައި ހިމެނޭ ބަޚަބަރު އަދި އެހެން ބައެއް ޝޯވތަކުގައިވެސް ވަނީ މުހިއްމު ދައުރެއް އަދާކުރައްވާފައެވެ.

ކޮމޭޑިއަން އެކްޓަރެއްގެ އިތުރުން އަޙްމަދު ޝާހިދަކީ، ދިވެހި ޅެންވެރިކަމަށްވެސް ޚިދުމަތް ކުރައްވާފައިވާ ބޭފުޅެކެވެ. އަދި މުނިފޫހި ފިލުވުމުގެ ދާއިރާއިން އާއްމު ޚިދުމަތުގެ ހިއްވަރު ދިނުމުގެ އިނާމްވެސް އޭނާއަށް ލިބިވަޑައިގެންފައިވެއެވެ.