ފުރަތަމަ ބުރުގައި އައިވީއެފް ހެދުމަށް އެހީއަށް އެދުނު 37 މީހެއް ޝަރުޠު ހަމަވާކަމުގައި ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ)އިން ވިދާޅުވެއްޖެއެވެ.

އެންސްޕާއިން ވިދާޅުވީ، ސަރުކާރުގެ ފުރަތަމަ 14 ހަފްތާގެ ތެރޭގައި ހާސިލް ކުރެއްވުމަށް ކަނޑައަޅުއްވާފައިވާ ވަޢުދުތަކުގެ ތެރޭގައި ހިމެނޭ "އައި.ޔޫ.އައި" އަދި "އައި.ވީ.އެފް"ގެ ފަރުވާތައް އާސަންދަ ސްކީމް މެދުވެރިކޮށް ފޯރުކޮށްދިނުމަށްޓަކައި، އެކުލަވާލައި އާންމުކުރެވިފައިވާ "'އައި.ޔޫ.އައި" އަދި "އައި.ވީ.އެފް" ގެ ފަރުވާތައް އާސަންދަ ސްކީމް މެދުވެރިކޮށް ފޯރުކޮށްދިނުމާއި ގުޅޭ އުސޫލު" ގެ ދަށުން، ފަރުވާއަށް އެދި ހުށައެޅި، 153 ދެމަފިރިންގެ ތެރެއިން 37 ދެމަފިރިއެއްގެ ޝަރުޠު ހަމަވެފައިވާ ކަމަށާއި، އެފަރާތްތަކަށް އެފަރުވާއަށް ބޭނުންވާ އެހީ ހަމަޖައްސާފައިވާ ކަމަށެވެ. 

އެންސްޕާއިން ވިދާޅުވީ، ފުރަތަމަ ބުރުގައި އެހީ ހަމަޖެހިފައިވާ ފަރާތްތަކުން 30 ޖުލައި 2024 ގެ ކުރިން ފަރުވާ ކުރިއަށްގެންދާނެގޮތުގެ ޕްލޭން ހިއްސާކުރުމާގުޅޭގޮތުން އެ އެޖެންސީން އެފަރާތްތަކަށް މަޢުލޫމާތު ފޯރުކޮށްދޭނެ ކަމަށެވެ.

މީގެ އިތުރުން އެންސްޕާއިން ވިދާޅުވީ، 15 މޭ 2024 ގެ ނިޔަލަށް ލިޔެކިޔުން ހަމަކޮށް ހުށަހަޅުއްވާފައިނުވާ ފަރާތްތަކާއި، އަލަށް އެހީއަށްއެދި ހުށަހަޅުއްވަން ބޭނުންވާ ފަރާތްތަކަށް، 31 ޖުލައި 2024 ގެ 14:00 ނިޔަލަށް ފޯމާއި، ލިޔެކިޔުން ހުށަހެޅުމުގެ ސުންގަޑި އިތުރުކޮށްދެއްްވާފައިވާ ކަމަށެވެ. އަދި މިއެހީއަށް ޝަރުތުހަމަނުވާކަމަށް މިފަހަރު ކަނޑައަޅާފައިވާ ފަރާތްތަކުގެ ތެރެއިން ހާލަތުބަދަލުވެފައިވާ ފަރާތްތަކަށްވެސް، 31 ޖުލައި 2024 ގެ 14:00 ނިޔަލަށް އެހީއަށް އެދި އަލުން ހުށަހެޅުމުގެ ފުރުސަތު އޮންނާނެ ކަމުގައިވެސް އެންސްޕާއިން ވަނީ ވިދާޅުވެފައެވެ.

2024 ވަނަ އަހަރު "އައި.ވީ.އެފް"ގެ ފަރުވާއަށް 100 ދެމަފިރިއަކަށް އެހީ ހަމަޖައްސައި ދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ނިންމަވާފައެވެ. ރާއްޖޭގައި ދަރިމައިވުމުގެ މައްސަލަ ތަކުގެ ސަބަބުން ދަރިން ނުލިބޭ ފަރާތްތަކަށް، ސަރުކާރުން އެހީ ދެއްވަން ނިންމެވި ނިންމެވުމަކީ، ވަރަށް ރަނގަޅު ކަމެއްކަން އާއްމު ރައްޔިތުންވެސް ވަނީ ފާހަގަކޮށްފައެވެ.