ސަމޯއާ އެގްރީމެންޓްގައި ދިވެހިރާއްޖެއިން ސޮއިކޮށްފައިވަނީ އިސްލާމްދީނާ، އަދި ދިވެހިރާއްޖޭގެ ޤާނޫނު އަސާސީއާ ފުށުއަރާ މާއްދާތަކަށް ޑެކްލަރޭޝަން އަދި ރެޒަވޭޝަން ހުށައެޅުމަށް ފަހުގައި ކަމަށް، ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސް ޕަރސަން ހީނާ ވަލީދު ވިދާޅުވެއްޖެއެވެ.

ހީނާ ވަލީދު މިހެން ވިދާޅުވީ، ސަމޯއާ އެގްރިމެންޓްގައި ރާއްޖެއިން ސޮއެކުރުމަށް ރައްޔިތުންގެ މަޖިލީހުން ފާސްކުރުމާއިއެކު އިއްޔެ އެ އެއްބަސްވުމުގައި ރާއްޖެއިން ސޮއެކުރުމާއި ގުޅިގެން ސަރުކާރަށް އަމާޒުވެފައިވާ ފާޑުކިޔުންތަކަށް ރައްދުދެއްވައި، އެކްސްގައި ލިޔުއްވި ޕޯސްޓުގައެވެ.

ހީނާ ވިދާޅުވީ، ރާއްޖެއިން ސަމޯއާ އެގްރިމެންޓްގައި ސޮއެކޮށްފައި ވަނީ، ޖުމްލަ 12 މާއްދާއަކަށް ޑެކްލަރޭޝަން އަދި ރެޒަވޭޝަން ހުށައަޅާފައި ކަމަށެވެ. އަދި މީގެ ކުރިންވެސް ރާއްޖެއިން ބައިވެރިވެފައިވާ މުޢާހަދާތަކުގައި ސޮއިކޮށްފައިވަނީ މިފަދަ މާއްދާތަކަށް ރެޒަވޭޝަން ހުށައެޅުމަށްފަހުގައިކަން ހީނާ ފާހަގަކުރެއްވިއެވެ. ޑެކްލަރޭޝަން އަދި ރެޒަވޭޝަންއަކީ، ރާއްޖޭގެ ޤާނޫނުތަކާއި ޤަވާއިދުތަކާއި ޚިލާފުކަންކަން ހިމެނޭ މާއްދާތަކަށް ރާއްޖެއިން އަމަލު ނުކުރާނެކަން ބަޔާންކޮށް ހުށައަޅާ ނުކުތާތަކެވެ. 

Advertisement

ހީނާ ވިދާޅުވީ، އިސްލާމްދީނާ، އަދި ދިވެހިރާއްޖޭގެ ޤާނޫނު އަސާސީއާ ފުށުއަރާ އެއްވެސް ކަމަކަށް މިސަރުކާރުން ފުރުޞަތުނުދޭނެ ކަމުގެ ފުރިހަމަ ޔަޤީންކަން އަރުވާކަމަށެވެ.

ސަމޯއާ އެގްރިމެންޓްގައި ސޮއެކުރުމަށް އެފްރިކާގެ ބައްރުގެ ބައެއް ޤައުމުތަކާއި، އިސްލާމީ ދުނިޔޭގެ ބައެއް ޤައުމުތަކުން ދެކޮޅު ހަދާއިރު، އޭގެ މައިގަނޑު ސަބަބުތަކުގެ ތެރޭގައި ސަމޯއާ އެގްރިމެންޓަށް އެއްބަސްވާ ޤައުމުތަކުން، އެޤައުމުގެ ރައްޔިތުންނަށް ދޭންޖެހޭ އިންސާނީ ޙައްޤުތަކުގެ ގޮތުގައި، އެއްޖިއްސުން ކައިވެނި ކުރުމާއި، ޖިންސް ބަދަލު ކުރުމާއި އެބޯޝަން ހެދުމާއި، އެމީހަކު ބޭނުންވާ ދީނަކަށް އުޅުމުގެ މިނިވަންކަން ދޭންޖެހޭނެކަމަށް ހިމަނާފައި އޮންނަ އޮތުން ހިމެނެވެ.  

ދިވެހިރާއްޖޭގެ ފަރާތުން ސަމޯއާ އެގްރީމެންޓްގައި އިއްޔެ ސޮއެކުރެއްވީ، ބެލްޖިއަމްއަށް ދިވެހިރާއްޖެއިން ކަނޑައަޅުއްވާފައިވާ ސަފީރު ޤީލާ ޢަލީ އެވެ. އެރަސްމިއްޔާތު ބާއްވާފައި ވަނީ، އިއްޔެ ބެލްޖިއަމްގެ ވެރިރަށް ބްރަސެލްސްގައި ހުންނަ އޯގަނައިޒޭޝަން އޮފް ދި އެފްރިކަން، ކެރީބިއަން، އެންޑް ޕެސިފިކް ސްޓޭޓްސްގެ ހެޑްކުއާޓަގައި އިއްޔެއެވެ.