ދިވެހިރާއްޖެއިން ތުރުކިޔޭއަށާއި ޕާކިސްތާނަށް ޢައްޔަނުކުރެއްވުމަށް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވި ދެބޭފުޅަކަށް ރައްޔިތުންގެ މަޖިލީހުން މިއަދު ރުހުން ދީފިއެވެ.

ރައްޔިތުންގެ މަޖިލީހުން މިއަދު، ރުހުން ދީފައި ވަނީ، ރާއްޖެއިން ތުރުކިޔޭއަށް ކަނޑައަޅުއްވާ ސަފީރު ކަމުގެ މަޤާމަށް، މިހާރު ފޮރިން މިނިސްޓްރީގެ ސްޓޭޓް މިނިސްޓަރުގެ މަގާމުގައި ހުންނެވި ކުރީގެ ޗީފް އޮފް ޑިފެންސް ފޯސް، ލެފްޓިނެންޓު ޖެނެރަލް، ރިޓަޔާޑް، އަބްދުއްރަހީމް އަބްދުއްލަތީފަށާއި، ރާއްޖެއިން ޕާކިސްތާނަށް ކަނޑައަޅާ ސަފީރުގެ މަޤާމަށް، ނ. ހޮޅުދޫ، އުފަންވެލި، ޠާހާ މުހައްމަދަށެވެ.

ކުރީގެ ޗީފް އޮފް ޑިފެންސް ފޯސް، ލެފްޓިނެންޓު ޖެނެރަލް، ރިޓަޔާޑް، އަބްދުއްރަހީމް އަބްދުއްލަތީފަށް ރުހުން އޮތް ކަމަށް 82 މެމްބަރަކު ވޯޓު ދެއްވި އިރު، ޠާހާއަށް ރުހުން އޮތް ކަމަށްވެސް 82 މެމްބަރަކު ވޯޓު ދެއްވިއެވެ.

ރައްޔިތުންގެ މަޖިލީހުން މީގެ ކުރިންވަނީ، ދިވެހިރާއްޖެއިން ސަޢޫދީ ޢަރަބިއްޔާއަށް ކަނޑައަޅުއްވާ ސަފީރުގެ މަޤާމަށް، ޠާހާ ޢައްޔަނުކުރެއްވުމަށްވެސް ރުހުންދީފައެވެ. އެހެން ނަމަވެސް ރައީސުލްޖުމްހޫރިއްޔާ ވަނީ، ފަހުން ޠާހާ ޕާކިސްތާނުގެ ސަފީރު ކަމުގެ މަޤާމަށް ބަދަލުކުރެއްވުމަށް ނިންމަވައި، އަލުން ރައްޔިތުންގެ މަޖިލީހުގެ ރުހުން ހޯއްދެވުމަށް ހުށައަޅުއްވާފައެވެ.

ތުރުކިޔޭގައި ދިވެހިރާއްޖޭގެ އެމްބަސީއެއް ޤާއިމްކުރެއްވުމަށް ނިންމެވީ ހުސްވި ޑިސެމްބަރު މަހުގައި މިސަރުކާރުންނެވެ. މިގޮތުން ކުރީގެ ޗީފް އޮފް ޑިފެންސް ފޯސް، ލެފްޓިނެންޓު ޖެނެރަލް، ރިޓަޔާޑް، އަބްދުއްރަހީމް އަބްދުއްލަތީފަކީ، ރާއްޖެއިން ތުރުކިޔޭއަށް ކަނޑައަޅުއްވާ ފުރަތަމަ ސަފީރެވެ.