ގއ. ވިލިގިލީގައި އަންހެނެއްގެ ބޮލުގައި ގާބުރިއަކުން ޖެހިކަމުގެ ތުހުމަތުގައި 32 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމުގައި ފުލުހުން ބުނެފިއެވެ.

އެނގިފައިވާ ގޮތުގައި ފުލުހުން ރޭ ދަންވަރު، ހައްޔަރުކޮށްފައި ވަނީ، މިސަރުކާރަށް ސޯޝަލް މީޑިއާގައި ވަރަށް ބޮޑަށް ފާޑުކިޔައި، އަދި ސަރުކާރުގެ ވެރިންނަށް އެކި ތުހުމަތުތައްކޮށް ސޯޝަލްމީޑިއާގައި ޕޯސްޓްތައް ކުރަމުން އައި، ސޯޝަލް މީޑިއާ އެކްޓިވިސްޓް އަދި މަސްވެރިޔާ ޢަލީ ސާޖިދެވެ.

ފުލުހުންގެ އިދާރާއިން ބުނީ، ގއ. ވިލިގިލީގައި އަންހެނެއްގެ ގައިގައި، ގާބުރިއަކުން ޖަހައި މާރާމާރީ ހިންގާފައިވާކަން ފުލުހުންނަށް ރިޕޯޓްކޮށްފައި ވަނީ ރޭ ދަންވަރު ކަމަށެވެ. އަދި އެމާރާމާރީގައި އަނިޔާވެފައި ވަނީ، އުމުރުން 46 އަހަރުގެ އަންހެނަކަށް ކަމަށާއި އެމީހާއަށް ވިލިގިލީގައި ހުންނަ ގއ. އަތޮޅު ހޮސްޕިޓަލުގައި ފަރުވާ ދިނުމަށްފަހު ދޫކޮށްލާފައިވާ ކަމުގައިވެސް ފުލުހުންގެ އިދާރާއިން ވަނީ ބުނެފައެވެ.

މާރާމާރީގެ މިމައްސަލަ ތަޙްޤީޤު ކުރަމުންދާ ކަމުގައި ފުލުހުންގެ އިދާރާއިން ވަނީ ބުނެފައެވެ.