މިއަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ވާދަކުރަން ބޭނުންވާ ފަރާތްތަކަށް މިއަދުންފެށިގެން ކެންޑިޑެންސީ ހުށައެޅުމުގެ ފުރުޞަތު އިލެކްޝަންސް ކޮމިޝަނުން ހުޅުވާލައިފިއެވެ.

އެކޮމިޝަނުން ބުނީ، ރިޔާސީ އިންތިޚާބުގައި ވާދަކުރަން އެދޭ ކެނޑިޑޭޓުން އިދާރީ ފީގެ ގޮތުގައި 1 ލައްކަ ރުފިޔާ ދައްކަން ޖެހޭނެކަމަށެވެ. މިއީ ރިޔާސީ އިންތިޚާބުގެ ޤާނޫނުގައި އިންތިޚާބަށް ކުރިމަތިލާ ކެންޑިޑޭޓުން ދައްކަންޖެހޭނެކަމަށް ކަނޑައަޅާފައިވާ ފީއެކެވެ. އިލެކްޝަންސް ކޮމިޝަނުން ވިދާޅުވީ އެފީ ދައްކަން ޖެހޭނީ، ބަނޑޭރި ޕޯޓަލް މެދުވެރިކޮށް ކަމަށެވެ.

އެކޮމިޝަނުން ބުނީ، އިންތިޚާބުގައި ވާދަކުރަން އެދޭ ކެންޑިޑޭޓުން، ކެންޑިޑެންސީ ހުށައެޅުމަށް 2023 ޖުލައި 23 ވާ އާދީއްތަ ދުވަހުގެ ހެނދުނު 9:00 ން ފެށިގެން 2023 އޮގަސްޓު 7 ވާ ހޯމަ ދުވަހުގެ މެންދުރުފަހު 2:00އާ ހަމައަށް ފުރުޞަތު ހުޅުވާލާފައިވާ ކަމަށެވެ.

އަދި ރިޔާސީ އިންތިޚާބަށް ކުރިމަތިލުމަށް އެދޭ މީހުން ރިޔާސީ އިންތިޚާބަށް ކުރިމަތިލުމަށް އެދޭ ފޯމާއި ތަކެތި ހުށަހަޅަންވާނީ އިންތިޚާބާބެހޭ މަރުކަޒު (ދަރުބާރުގެ) އަށް ކަމަށާއި، އަދި އިލެކްޝަންސް ކޮމިޝަނުން އެ ތަކެތި ބަލައިގަންނާނީ 2023 ޖުލައި 23 ވާ އާދީއްތަ ދުވަހުން ފެށިގެން 2023 އޮގަސްޓު 7 ވާ ހޯމަ ދުވަހުގެ ނިޔަލަށް ހުކުރު ދުވަސް ފިޔަވައި ކޮންމެ ދުވަހަކު ހެނދުނު 9:00 ން މެންދުރުފަހު 2:00 އަށް އަދި ހުކުރު ދުވަހުގައި ފޯމު ބަލައިގަންނާނީ މެންދުރުފަހު 2:00 ން ހަވީރު 4:00 އަށް ކަމުގައިވެސް އެކޮމިޝަނުން  ވަނީ ބުނެފައެވެ.

ރިޔާސީ އިންތިޚާބުގެ ވޯޓުލުން ބޭއްވުމަށް ހަމަޖައްސާފައި ވަނީ، 2023 ސެޕްޓެމްބަރު 9ވާ، ހޮނިހިރު ދުވަހުގައެވެ.