ހުޅުމާލެ ފޭސް 2 އިން ދޫކޮށްފައިވާ ވިނަރެސް ފްލެޓްތަކުގެ ތެރެއިން އިމާރާތެއް ސެކިއުރިޓީ މައި ދޮރުތައް މީހަކު ހަލާކުކޮށްލައިފިއެވެ.

އެޗްޑީސީން ވަނީ، ވިނަރެސް އެޕާޓްމަންޓް ޢިމާރާތެއްގެ ތިރީ ސެކިއުރިޓީ މައިދޮރެއް މީހަކު ހަލާކުކޮށްލާ މަންޒަރު ފެންނަ ސީސީޓީވީ ވީޑިއޯގެ ސްކްރީން ޝޮޓްތައް އާއްމުކޮށްފައެވެ. އެ ކަމާއި ގުޅޭ ގޮތުން އެޗްޑީސީން ބުނެފައި ވަނީ، އެދޮރުތައް ހަލާކުކޮށްލާފައި ވަނީ މިއަދުގެ މެންދުރު ފަހުކަމަށެވެ. މިގޮތުން ވިނަރެސް ޢިމާރާތަށް ވަންނަން ހުންނަ ސެކިއުރިޓީ މައި ދޮރާއި، އެއް ފަންގިފިލާގެ ސެކިއުރިޓީ ދޮރު ވަނީ ހަލާކުކޮށްލާފައެވެ.

އެޗްޑީސީން ވަނީ، ވިނަރެސް ފްލެޓްތަކުގެ ދިރިއުޅޭ ފަރާތްތަކުގެ ސަލާމަތާއި ރައްކާތެރިކަން ކަށަވަރު ކުރުމުގެ ގޮތުން އެޕާޓްމަންޓް ބިލްޑިންގތަކުގެ މައިދޮރުތަކުގައި، އެކްސެސް ސެކިއުރިޓީ ސިސްޓަމްތައް ހަރުކޮށްފައެވެ. އަދި ކޮންމެ ފްލެޓަކަަށްވެސް ސެކިއުރިޓީ އެކްސެސް ސިސްޓަމްގެ 3 ޓެގް ދޫކުރަމުންދާކަމުގައިވެސް އެޗްޑީސީން ބުނެފައިވެއެވެ.

ވިނަރެސް ފްލެޓް ޢިމާރާތްތަކުގެ މައި ދޮރުތަކުގައި އެކްސެސް ސެކިއުރިޓީ ސިސްޓަމް ހަރުކޮށް ބޭނުން ކުރަންފެށުމަށް ތައްޔާރުވެފައިވާކަން ކުރިން ދުރާލައި އެޗްޑީއީން އާއްމުކޮށް އިޢުލާނުވެސް ކުރިއެވެ.

މިކަމާއި ގުޅިގެން އެ އިމާރާތުގައި ދިރިއުޅޭ ބައެއް މީހުންނާއި އާއްމު ބައެއް މީހުންވެސް ވަނީ ކަންބޮޑުވުން ފާޅުކޮށްފައެވެ.

ރާއްޖޭގައި ހިންގި އެންމެ ބޮޑު ހައުސިންގ މަޝްރޫޢު ކަމުގައިވާ ހިޔާ މަޝްރޫޢުގެ ދަށުން އަޅާފައިވާ 16 ޓަވަރުގައިވެސް އެކްސެސް ކޮންޓްރޯލް ސިސްޓަމްތައް ހުރެއެވެ. އެހެން ނަމަވެސް އެ ސިސްޓަމްތައް ބޭނުން ނުކުރާތީ، ހިޔާ ފްލެޓްގައި ދިރިއުޅޭ ބައެއް ފަރާތްތަކުން އެކަމުގެ ކަންބޮޑުވުންތައް ފާޅުކުރަމުން ގެންދެއެވެ.