ދައުލަތުގެ ޚަރަދު ކުޑަކުރެއްވުމުގެ ގޮތުން މިއަހަރު، މިނިވަން ދުވަހަށް ފުޅަނދު ބުރާއި، ކުޅިވަރުތަކާއި ރިސެޕްޝަން ފަދަ ކަންކަން ނުބޭއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.

އެމަނިކުފާނު މިކަން ހާމަކުރެއްވީ އެކްސްގައި ކުރެއްވި ޕޯސްޓެއްގައެވެ.

ރައީސުލްޖުމްހޫރިއްޔާ ވިދާޅުވީ، ދައުލަތުގެ ޚަރަދުތައް ކުޑަކުރެއްވުމަށް ބައެއް ފިޔަވަޅުތައް އެޅުމަށް ނިންމަވާފައިވާ ކަމަށާއި، އެގޮތުން، އެކި މުނާސަބަތުތަކުގައި ބާއްވާ ޙަަފްލާތަކަށް ކުރާ ޚަރަދުތައް ކުޑަކުރުން ނުވަތަ ނުބޭއްވުން ހިމެނޭކަމަށެވެ. އެހެންވެ ކުރިޔަށް އޮތް މިނިވަން ދުވަހަށް ފުޅަނދު ބުރާއި، ކުޅިވަރުތަކާއި ރިސެޕްޝަން ފަދަ ކަންކަން ނުބޭއްވުމަށް ނިންމަވާފައިވާ ކަމަށާއި، އެދުވަހު ހަމައެކަނި މިނިވަން ދުވަހުގެ ރަސްމީ ޖަލްސާ އެކަނި ބޭއްވުމަށް ނިންމަވައި އެކަން ކަމާއި ބެހޭ މުއައްސަސާތަކަށް އަންގަވާފައިވާ ކަމަށެވެ.

ކޯވިޑް-19ގެ ޢާލަމީ ބަލިމަޑުކަމުގެ ދުވަސްވަރު ފިޔަވައި، ރައީސް މައުމޫނުގެ ޒަމާނުން ފެށިގެން، ދިވެހިރާއްޖޭގެ މިނިވަން ދުވަސް ކުލަގަދަ ގޮތެއްގައި އައީ ފާހަގަކުރަމުންނެވެ. މިގޮތުން ހެވިކަމާއި ކުޅިވަރުތައް ދައްކާލުމާއި، ފުޅަނދުބުރު ބޭއްވުމާއި، ރައީސުލްޖުމްހޫރިއްޔާގެ ދެ ކަނބަލުން ބާއްވާ ޚާއްޞަ ޖާފަތް ބޭއްވުމަކީ ޘަޤާފަތެއްގެ ގޮތުގައި ހިނގަމުން އައި ކަމެކެވެ.

ރާއްޖޭގައި މިނިވަން ދުވަސް އެންމެ ކުލަގަދަކޮށް ފާހަގަކޮށްފައި ވަނީ، މިނިވަންކަމަށް 50 އަހަރު ފުރުން ފާހަގަކުރުމުގެ ގޮތުން، ރައީސުލްޖުމްހޫރިއްޔާ ޢަބްދުﷲ ޔާމީން ޢަބުދުލްޤައްޔޫމްގެ ޒަޢާމަތުގައި 2015 ވަނަ އަހަރުގައެވެ. އެއަހަރު މިނިވަން 50 ވަރަށް ކުލަ ގަދަގޮތެއްގައި މުޅި ރާއްޖޭގައި ފާހަގަކުރުމަށް ބޮޑެތި ހޭދަތަކެއް ކޮށްފައިވެއެވެ،