އާއްމުންގެ އަތުން ނަގާ ޖީއެސްޓީއާއެކު އެހެން ބައެއް ޓެކްސްތަކާއި ފީތައް ބޮޑުކުރަން ސަރުކާރުން ނިންމާފައިވާ ކަމުގައި ފިނޭންސް މިނިސްޓްރީން ހާމަކުރައްވައިފިއެވެ.

ފިނޭންސް މިނިސްޓްރީން މިއަދުވަނީ،  ދައުލަތުގެ މީޑިއަމް ޓާމް ރެވެނިއު ސްޓްރެޓަޖީ 2024  ސިޔާސަތު އާއްމުކޮށް ޝާއިޢުކޮށްފައެވެ.

އެސިޔާސަތުގައި އަންނަ އަހަރުން ފެށިގެން މިދައުރުގެ ތެރޭގައި ބޮޑު ކުރުމަށް ނިންމާފައިވާ ޓެކްސްތަކާއި ފީތައް ވަނީ ހިމަނާފައެވެ. އެހެން ނަމަވެސް އެ އަދަދުތައް އަދި ފިނޭންސް މިނިސްޓްރީން ހާމަކޮށްފައެއް ނުވެއެވެ.

Advertisement

އަންނަ އަހަރުންފެށިިގެން ބޮޑު ކުރުމަށް ނިންމާފައިވާ ޓެކްސްތަތަކާއި ފީތަކުގެ ތެރޭގައި، ޖީއެސްޓީ، ޓީޖީއެސްޓީ، އިމްޕޯޓް ޑިއުޓީ، އެއާޕޯޓް ޑިވޮލޮޕްމެންޓް ފީ، ފަތުރުވެރިކަމަށް ދޫކޮށްފައިވާ ރަށްތަކާއި ބިން ބިމުގެ ބިމު ކުއްޔާއި، މުވާޞަލާތީ ޚިދުމަތްދޭ ކުންފުނިތަކުން ދައްކަންޖެހޭ ކޯޕަރޭޓް އިންކަމް ޓެކުހާއި، ފަރުދުންގެ އާމްދަނީން ނަގާ އިންކަމް ޓެކުހާއި، ގްރީން ޓެކްސް ވެސް ހިމެނެއެވެ.

މިހާރުވެސް ޖީއެސްޓީ ނުވަތަ ޚިދުމަތާއި މުދަލުގެ އަގުން އާއްމު ރައްޔިތުންގެ އަގުން ޓެކުހުގެ ގޮތުގައި ކޮންމެ 100ރ އަކުން 8 ރުފިޔާ ނަގަމުން އަންނައިރު، ޖީއެސްޓީ ނަގާ މުދަލުގެ ބާވަތްތައް އިތުރު ކުރުމަށްވެސް ވަނީ ހިމަނާފައެވެ. ޓީޖީއެސްޓީގެ ގޮތުގައި މިހާރު ކޮންމެ 100ރ އަކުން 16ރ ނަގަމުން އަންނަ އިރު، އެއަދަދުވެސް ބޮޑުކުރުމާއި، އެކު ބަނގުރަލާއި އޫރުމަހާއި ދުންފަތުގެ ބާވަތްތަކުން ނަގަމުން އަންނަ އިމްޕޯޓް ޑިއުޓީ ބޮޑުކުރުމަށްވެސް ނިންމާފައިވެއެވެ.

ފަރުދުންގެ އާމްދަނީން އިންކަމް ޓެކްސް ނަގާ އަދަދުވެސް ދަށްކުރުމަށް ނިންމާފައި ވާއިރު، ސިނަމާލެ ބްރިޖު ފަދަ އިންފްރާސްޓްރަކްޗަރ ތަކުން، ޓޯލް ފީއެއް ނެގުމަށްވެސް، ދައުލަތުގެ އާމްދަނީ އިތުރުކުރުމަށް އެކުލަވާލާފައިވާ މެދުރާސްތާ ސިޔާސަތުގައި ވަނީ ހިމަނާފައެވެ. އަދި މިސިޔާސަތާއި ގުޅޭ ގޮތުން ވަޒީރުންގެ މަޖިލީހުގައި މަޝްވަރާކޮށް ވަނީ ފާސްކޮށްފައެވެ.

މި ސިޔާސަތު ވަޒީރުންގެ މަޖިލީހުން ފާސްކޮށްފައި ވަނީ، މި ޖޫންމަހުގެ 24 ވަނަ ދުވަހު ބޭއްވި ވަޒީރުންގެ މަޖިލީހުގެ ބައްދަލުވުމުގައެވެ.

ސަރުކާރުން ހާމަކޮށްފައިވާ ގޮތުގައި ދައުލަތުގެ އާމްދަނީ އިތުރުކުރުމަށް އެކުލަވާލާފައިވާ މެދުރާސްތާ ސިޔާސަތުތައް ތަންފީޒް ކުރާނީ ކުރިޔަށް އޮތް ހަތަރު އަހަރުގެ ތެރެއަށް ބަހާލައިގެންނެވެ.