މިހަފްތާގައި ރާއްޖެއިން، މެނިންގޯކޮކަލް ބަލިޖެހުނު މީހަކު ދެނެގަނެވުމާއި ގުޅިގެން ކުރިޔަށް ގެންދިޔަ ކޮންޓްކެޓް ޓްރޭސިންގެ ތެރެއިން މިހާތަނަށް 46 މީހަކު ދެނެގަނެވިފައިވާ ކަމުގައި އެޗްޕީއޭއިން ވިދާޅުވެއްޖެއެވެ.

ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން،  އެޗްޕީއޭގެ ޑެޕިއުޓީ ޑިރެކްޓަރ ޖެނެރަލް އޮފް ޕަބްލިކް ހެލްތު އިބްރާޙިމް އަޝްރަފް ވިދާޅުވީ، އެބަލި ރާއްޖެއިން ދެނެގަނެވުމާއި އެކު އެޗްޕީއިން ކުރިޔަށް ގެންދާ ކޮންޓެކްޓް ޓްރޭސިންގެ ގެ ތެރެއިން ފާހަގަވި 46 މީހުންގެ ތެރެއިން، ބޭސްދޭން ޖެހޭ މީހުންނަށް މިހާރު ވަނީ ބޭސްދެވިފައިވާ ކަމަށާއި، އެހެން ނަމަވެސް އަދިވެސް ކޮންޓެކްޓް ޓްރޭސިން އިތުރަށް ކުރިޔަށް ގެންދާ ކަމުގައި އޭނާ ވިދާޅުވިއެވެ.

އޭނާ ވިދާޅުވީ، މެނިންގޯކޮކަލް ބަލިޖައްސާ ބެކްޓީރިއާ ފެތުރިގެން ދިޔަ ނުދިނުމަށްވެސް އެޗްޕީއޭއިން ފިޔަވަޅުތައް އަޅަމުން ގެންދާ ކަމުގައި އޭނާ ވިދާޅުވިއެވެ.

ރޭގެ ޕްރޮގްރާމްގައި ވާހަކަފުޅު ދައްކަވަމުން، އެތެރެހަށީގެ ޙާއްޞަ ޑރ. ޑރ މޫސާ މުރާދު ވިދާޅުވީ، މެނިންގޯކޮކަލް ބަލިޖައްސަނީ ބެކްޓީރިއާއަކުން ކަމަށް ވީނަމަވެސް މި ބެކްޓީރިއާ އެކެއްގެގައިން އަނެކެއްގެ ގަޔަށް ވާޞިލްވަނީ، ކެއްސައި ކިނބިހި އަޅާއިރު، ބަލިމީހާގެ އަނގައިންނާއި ނޭފަތުން ނުކުންނަ ތިކިތަކުގެ ޒަރީއާއިން ކަމަށެވެ. 

ޑރ. މޫސާ މުރާދު ވިދާޅުވީ، މިބަލީގައިވެސް ފުރަތަމަ ފެންނަނީ އާދައިގެ ރޯގާއެއްގެ އަލާމާތްތައް ކަމަށް ވީނަމަވެސް، ޚާއްޞަ ސަމާލުކަމެއް ދޭންޖެހެނީ، މިބައްޔަކީ ތަންކޮޅެއް އަވަހަށް ނުރައްކާވެދާނެ ބައްޔަކަށް ވާތީ ކަމަށެވެ.

ބެކްޓީރިއާއެއްގެ ސަބަބުން ޖެހޭ މިބައްޔަކީ އިންފެކްޝަނެކެވެ. މިބެކްޓީރިއާ ހަމަލާދެނީ ހަށިގަނޑުގެ ނާރުތަކުގެ ނިޒާމަށާއި ސިކުނޑިއާ ލޭ ހޮޅިތަކަށެވެ. އެހެންވެ ބަލި ޖެހޭތާ 24 ގަޑި އިރުގެ ތެރޭގައިވެސް ބައެއް މީހުންގެ ހާލަތު ވަރަށް ނާޒުކު ދަރަޖައަކަށް ދެއެވެ. ޑޮކްޓަރ މޫސާ މުރާދު ވިދާޅުވީ، މިބެކްޓީރިއާ ސިކުނޑިއަށާއި މުޅި ހަށިގަނޑަށް ފެތުރިގެންދާ ހާލަތްތަކުގައި ބަލިމީހާގެ ފުރާނަ ގެއްލުމުގެ ފުރުޞަތު ބޮޑުވާ ކަމަށެވެ.

އިންވޭސިވް މެނިންގޯކޮކަލްއަކީ، ރާއްޖެއިން އަލަށް ފެނުނު ބައްޔެއް ނޫނެވެ. މީގެ ކުރިންވެސް މިބަލި ރާއްޖޭގައި ބައެއް މީހުންނަށް ޖެހިފައިވެއެވެ. އަދި މިބަލިން ރައްކާތެރިވުމަށް ޖަހާ މެނިންޖައިޓިސް ވެކްސިނަކީ، ރާއްޖެއިން ލިބެން ހުއްނަ ވެކްސިނެކެވެ.

އިންވޭސިވް މެނިންގޯކޮކަލްއަކީ ބޭރު ޤައުމުތަކުގައި ފެތުރޭ ބައްޔަކަށްވާތީ، ރާއްޖެއިން ބޭރަށް ޚާއްޞަކޮށް ޙައްޖާއި ޢުމްރާގެ އަޅުކަމަށް ވަޑައިގަންނަވާއިރު، މިވެކްސިން ޖެހުމަށް އެޗްޕީއޭއިން އިލްތިމާސް ކުރެއެވެ. އަދި ފުރުމުގެ 14 ދުވަސް ކުރިން ވެކްސިން ޖެހުމަކީ، ވެކްސިންގެ އަސަރު ރަނގަޅަށް ކުރާނެ ކަމެއް ކަމުގައިވެސް އެޗްޕީއޭއިން ހާމަކުރައްވާފައިވެއެވެ.