ހުނަރުވެރި ޑިފެންސިވް މިޑްފީލްޑަރެއްގެ ގޮތުގައި ދިވެހި ފުޓުބޯޅައިން މުޅި ރާއްޖެއަށް ވިދާލި، މުޙައްމަދު އާރިފް (ބަކާ)، މިއަދު ނިޔާވެއްޖެއެވެ.

ހަބަރު ލިބިފައިވާ ގޮތުގައި ބަކާއަށް އައިސީޔޫގައި ފަރުވާ ދޭން ފެށީ، އޭނާ ޙައްޖުގެ މަތިވެރި އަޅުކަމަށްފަހު މާލެ އައިފަހުން، ހުން އައިސް، ނެވާލުމަށް އުނދަގޫވާތީއެވެ. އުމުރުން 38 އަހަރުގެ ބަކާގެ ފަރުވާ ކުރިޔަށް ގެންގޮސްފައިވަނީ އޭޑީކޭ ހޮސްޕިޓަލުގައެވެ.

އަނިޔާގެ ސަބަބުން މިދިޔަ އަހަރުގެ ދިވެހި ފުޓުބޯޅަ ސީޒަނުގައި ކުޅެފައިނުވާ ބަކާ އެންމެ ފަހުން ކުޅެފައިވަނީ، މިދިޔަ މެއި މަހު ފަހުކޮޅު ހެންވޭރު ދަނޑުގައި އެމް.އެސް. މޭޓްސް އިން އިންތިޒާމްކުރި ވެޓެރަންސް މުބާރާތުގައެވެ. އެއީ މެލޭޝިއާގައި އޮތް ވެޓެރެންސް މުބާރާތަކަށް ފަރިތަ ކުރުމުގެ ގޮތުން ބާއްވާފައިވާ މުބާރާތެކެވެ. ނަމަވެސް ޙައްޖުގެ އަޅުކަމަށް ފުރުމަށްޓަކައި، ބަކާ މެލޭޝިއާއަށް ދަތުރުކޮށްފައެއް ނުވެއެވެ.

އައްޑު އަތޮޅު ހިތަދޫއަށް އުފަން، ބަކާގެ ފުޓުބޯޅައިގެ ކެރިއަރު ފަށާފައިވަނީ 2004 ވަނަ އަހަރު އައިލެންޑު ފުޓުބޯޅަ ކްލަބް (އައި.އެފް.ސީ) އިންނެވެ. އޭގެ ފަހުން ނިއު ރޭޑިއަންޓް ސްޕޯޓްސް ކްލަބް، ވިކްޓަރީ ސްޕޯޓްސް ކްލަބް، ކްލަބް ވެލެންސިއާ، ވީބީ އައްޑޫ އެފްސީ، ކްލަބް އީގަލްސް، ކްލަބް ގްރީން ސްޓްރީޓްސް އަދި މާޒިޔާ ސްޕޯޓްސް އެންޑް ރެކްރިއޭޝަން ކްލަބަށް އޭނާ ކުޅެދީފައިވެއެވެ.

މީގެ އިތުރުން، 2018 ވަނަ އަހަރު ދިވެހި ރާއްޖެއިން ސާފް ޗެމްޕިއަންޝިޕް ކާމިޔާބުކުރި ޓީމުގައި ވެސް ބަކާ ހިމެނުނެވެ.