އިންޑިއާގެ ބޮޑުވަޒީރު ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގެންނެވުމަށް ރައީސް ކުރެއްވި ދަތުރުފުޅަށް، 1.4 މިލިޔަން ރުފިޔާ ޚަރަދުވި ކަމުގައި ރައީސުލްޖުމްހޫރިއްޔާގެ އޮފީހުން ހާމަކުރައްވައިފިއެވެ.

އެއޮފީހުން ހާމަކުރައްވާފައިވާ ގޮތުގައި 20 ބޭފުޅުންގެ ވަފުދަކާއި އެކު ރައީސުލްޖުމްހޫރިއްޔާ ކުރެއްވި މިދަތުރުފުޅަށް ޚަރަދުވެފައި ވަނީ ޖުމުލަ، 1،440،170.33ރ (އެއްމިލިޔަން ހަތަރުލައްކަ ސާޅީސާހާސް ސަތޭކަ ހަތްދިހަ ރުފިޔާ ތެއްތިރީސް ލާރި) އެވެ. މީގެ ކުރިން ރައީސުލްޖުމްހޫރިއްޔާ ކުރައްވާ ދަތުރުފުޅުތަކުގެ ޚަރަދު ތަފްސީލްތައް ރައީސުލްޖުމްހޫރިއްޔާގެ އޮފީހުން އާއްމު ކުރެއްވި ނަމަވެސް އެއޮފީހުން މިއަދު މީޑިއާތަކާއި ޙިއްޞާކޮށްފައި ވަނީ ދަތުރުފުޅަށް ޚަރަދުވި ޖުމުލަ ފައިސާގެ ޢަދަދު އެކަންޏެވެ. ކުރިން އެ މައުލޫމާތު ހާމަކުރައްވާއިރު، ޓިކެޓް ޚަރަދާއި، އެހެނިހެން ޚަރަދުތައް ވަކިވަކިން އެނގޭނެހެން ހާމަކުރައްވާފައި ވެއެވެ.

ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި، އިންޑިއާގެ ބޮޑުވަޒީރު ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގެންނެވުމަށް ރައީސުލްޖުމްހޫރިއްޔާ އާއި އެމަނިކުފާނުގެ ވަފުދުގައި ހިމެނޭ ބޭފުޅުން ދަތުރުފުޅުކުރައްވާފައި ވަނީ، މާލެއިން ކޮލަމްބޯއަށް، އަދި ކޮލަމްބޯއިން ދުބާއީއަށް ދިޔުމަށްފަހުގައި، ދުބާއީ އިންޑިއާގެ ވެރިރަށް ނިއުދިއްލީއަށެވެ. އެހެންވެ ދަތުރުފުޅަށް ކޮންމެ ކޮޅަކަށްވެސް އެއްދުވަސް ހޭދަވިކަން ރައީސުލްޖުމްހޫރިއްޔާގެ އޮފީހުން ފާހަގަކުރައްވާފައިވެއެވެ.

މިދަތުރުފުޅުގައި ރައީސުލްޖުމްހޫރިއްޔާ ދިއްލީއަށް ވަޑައިގެންނެވޫ ޖޫންމަހުގެ 8 ވަނަ ދުވަހުގައެވެ. އެނބުރި ރާއްޖެއަށް ވަޑައިގެންނެވީ ޖޫންމަހުގެ 11 ވަނަ ދުވަހުގައެވެ.

މިދަތުރުފުޅުން ޙާސިލްވި މުހިއްމު ކަންކަމުގެ ގޮތުގައި ރައީސުލްޖުމްހޫރިއްޔާގެ އޮފީހުން ފާހަގަ ކުރައްވާފައި ވަނީ، ދެޤައުމުގެ ގުޅުން ބަދަހިކުރުމަށްޓަކައި މަޝްވަރާކުރެވުމެވެ.