ހުޅުމާލެ 3 ވަނަ ފިޔަވަހީގެ ބިންހިއްކުމުގެ މަސައްކަތް އިއްޔެ އަލުން ފަށާފައިވާ ކަމުގައި އެޗްޑީސީން ހާމަކުރައްވައިފިއެވެ.

އެޗްޑީސީން ހުޅުމާލެ 3 ގެ ބިންހިއްކުމުގެ މަސައްކަތް ފަށާފައި ވަނީ، ހުސްވި އަހަރުގެ ސެޕްޓެންބަރު މަހުގެ ތެރޭގައެވެ. އަދި އެމަޝްރޫގެ ބިންހިއްކުމުގެ މަސައްކަތް ވަގުތީ ގޮތުން މެދު ކަނޑާލީ، ރާއްޖޭގެ ފަރުތަކަށް ދިމާވަމުން އަންނަ ގާހުދުވުމުގެ މައްސަލަ އާއި ގުޅިގެން، ރާއްޖޭގައި ހިންގާ ބިންހިއްކުމާއި ފަޅުފުންކުރުންފަދަ މަޝްރޫޢުތައް ހުއްޓާލުމަށް، އީޕީއޭއިން އެންގުމާއި ގުޅިގެންނެވެ.

ތިންވަނަ ފިޔަވަހީގެ ބިންހިއްކުމުގެ މަސައްކަތް އިއްޔެ އަލުން ފެށިއިރު، އެމަޝްރޫޢުގެ ދަށުން މިހާތަނަށް ހިއްކިފައި އޮތީ، 23 ހެކްޓަރެވެ. އަދި އިތުރު 40 ހެކްޓަރުގެ ބިންހިއްކުމަށް ހަމަޖެހިފައި ވާއިރު، އެ ސަރަހައްދުގައި އަޅާފައިވާ އުޅަނދު ފަހަރު ނެގުމަށް ދިން މުހުލަތުގައިވެސް އެތަނުން އުޅަނދުތައް ނަގާފައި ނުވާތީ، މަޝްރޫޢު ކުރިޔަށް ގެންދިޔުމަށް އެކަމުގެ ދަތިތައް ފޯރަމުންދާ ކަމުގައިވެސް އެޗްޑީސީން ފާހަގަކުރައްވާފައިވެއެވެ.

ހުޅުމާލެ 3 އަކީ، ބިންވެރިޔާ ސްކީމްގެ ދަށުން މާލޭގެ ރައްޔިތުންނަށް ގޯތި ދޫކުރުމަށްވެސް ހިމަނާފައިވާ ބިމެކެވެ.