ޑޮލަރުން އެސް.ޑީ.އެެފް އަށް ފައިސާ ޖަމާކުރަން ފެށީ މި ސަރުކާރުންކަމަށް ބުނުމަކީ އޮޅުވާލުމެއް ކަމުގައި ކުރީގެ ފިނޭންސް މިނިސްޓަރ އިބްރާހީމް ޢަމީރު ވިދާޅުވެއްޖެއެވެ.

ކުރީގެ މިނިސްޓަރ އަމީރު މިހެން ވިދާޅުވީ، ސޮވެރިންގ ޑިވޮލޮޕްމެންޓް ފަންޑަށް، ޑޮލަރުން ފައިސާ ޖަމާކުރަންފެށީ މިސަރުކާރުންކަމަށް ވިދާޅުވެ، މިސަރުކާރުގެ އިސްބައެއް ބޭފުޅުން ދައްކަވަމުން ގެންދަވާ ވާހަކަފުޅުތަކަށް ސޯޝަލްމީޑިއާގައި ރައްދުދެއްވައި ލިޔުއްވި ޕޯސްޓެއްގައެވެ.

ކުރީގެ ފިނޭންސް މިނިސްޓަރ އިބްރާހީމް ޢަމީރު ވިދާޅުވީ، ސޮވެރިންގ ޑިވޮލޮޕްމެންޓް ފަންޑާއި ގުޅޭ ގޮތުން މިސަރުކާރުން ތަކުރާރުކޮށް ވާހަކަތައް ދައްކަމުން ގެންދަނީ އޮޅުވާލައިގެން ކަމަށެވެ.

ކުރީގެ ފިނޭންސް މިނިސްޓަރ އިބްރާހީމް ޢަމީރު ވިދާޅުވީ، އެމްޑީޕީގެ ވެރިކަމުގެ ދައުރު ނިމުނުއިރު، ނޮވެމްބަރު 2023 ގައި، އެސް.ޑީ.އެފް ގައި ޑޮލަރުން 141.1 މިލިއަން ހުންނާނެ ކަމަށެވެ. އަދި އެމް.އެމް.އޭ ގައި ޑޮލަރު އެކައުންޓުގައި ކޭޝް ބެލެންސްއަކީ، 2 މިލިއަން ޑޮލަރު ކަމަށާއި، ފިކްސްޑް ޑިޕޮސިޓް އަދި ޑޮލަރު ޓީ-ބިލް އިންވެސްޓްމެންޓްގެ ގޮތުގައި 139.1 މިލިއަން ޑޮލަރު ހުރި ކަމުގައިވެސް ކުރީގެ ފިނޭންސް މިނިސްޓަރ ވިދާޅުވިއެވެ.

އަމީރު ވިދާޅުވީ، ޑޮލަރުން އެސް.ޑީ.އެެފް އަށް ފައިސާ ޖަމާކުރަން ފެށީ މި ސަރުކާރުންކަމަށް ބުނެ ވާހަކަ ދައްކަނީވެސް އޮޅުވާލައިގެން ކަމަށާއި، 2020 ވަނަ އަހަރު ޑޮލަރުން އެސް.ޑީ.އެފް އަށް ޖަމާކުރުން ހުއްޓާލީ، އެމް.އެމް.އޭ އާއެކު ހެދުނު އެޖެންސީ އެގްރިމެންޓެއްގެ ދަށުންކަމަށެވެ. އެހެންނަމަވެސް 2023 ވަނަ ކުރީ ކޮޅު ޑޮލަރުން އެސް.ޑީ.އެފް އަށް އަލުން ފައިސާ ޖަމާކުރަން ފަށާފައިވާ ކަމުގައިވެސް ޢަމީރު ވިދާޅުވިއެވެ.

މީގެ އިތުރުން ފިނޭންސް މިނިސްޓްރީއިން ނެރޭ ވީކްލީ ފިސްކަލް ޑިވެލޮޕްމެންޓްސް އިން ފެންނަ ގޮތުގައި އެސް.ޑީ.އެފް އަށް މި އަހަރުގެ މިހާތަނަށް ޓްރާންސްފަ ކުރެވުނީ 519.7 މިލިއަން ރުފިޔާ ކަމަށާއި، މިދިޔަ އަހަރު އެ މުއްދަތުގައި 479.8 މިލިއަން ރުފިޔާ ޖަމާކޮށްފައި ވާއިރު،  ތަކުރާރުކޮށް މިސަރުކާރުން ދައްކަމުން ދަނީ ކުރެވުނު ކޮން މޮޅުކަމެއްގެ ވާހަކައެއް ކަމެއް އެނގިވަޑައިނުގަންނަވާ ކަމުގައިވެސް އަމީރު ވިދާޅުވިއެވެ.