ޕީއެސްއައިޕީ މަޝްރޫޢުގެ ތަކުގެ %50 ގެދޮރުތަކަށް ޚާއްޞަ ކުރައްވާނެ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ހ. ވެޔޮވިލާގައި ސަރުކާރު ހިންގާ ޕާޓީ ޕީއެންސީގެ ހަރުގެ ހުޅުވުމަށް ރޭ ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާ ވިދާޅުވީ، މިއަހަރު ސަރުކާރަށް، ވަޢުދުތައް ފުއްދުމަށް ދަތިވެފައި އޮތީ، މިއަހަރުގެ ބަޖެޓަކީ، ސަރުކާރުން ބޭނުންވި ގޮތަށް ފާސްކުރެވިފައި އޮތް ބަޖެޓެއް ކަމުގައި ނުވާތީ ކަމަށެވެ. އެހެން ނަމަވެސް އަންނަ އަހަރަށް ލަފާކުރާ ދައުލަތުގެ ބަޖެޓް ވެގެންދާނީ، ސަރުކާރަށް ރައްޔިތުން ސުޕަރ މެޖޯރިޓީ ހޯދައިދީފައިވާ 20 ވަނަ ރައްޔިތުންގެ މަޖިލީހުން ފާސްކޮށްދޭނެ ބަޖެޓަކަށްވާތީ، ވަޢުދުތައް ފުއްދުމަށް އަންނަ އަހަރު މަގުތައް ފަހިވެގެންދާނެ ކަމުގެ އުއްމީދު ރައީސުލްޖުމްހޫރިއްޔާ އާކޮށްދެއްވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، އަންނަ އަހަރަށް ފާސްކުރާ ދައުލަތުގެ ބަޖެޓުން ހިންގާ މަޝްރޫޢުތަކުގެ ދެބައިކުޅަ އެއްބައި މަޝްރޫޢު ވެގެންދާނީ، ގެދޮރު އެޅުމަށް ޚާއްޞަ ކުރެވޭނެ މަޝްރޫޢުތަކަށް ކަމަށެވެ. އަދި ސަރުކާރުން ވެފައިވާ ވަޢުދުތައް އެގޮތުގައި ފުއްދަވާނެ ކަމަށް އެމަނިކުފާނުގެވާހަކަފުޅުގައި ވަނީ ޔަޤީންކަން ދެއްވާފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވީ އާބާދީ އާ ތަރައްޤި އެއްފަސްކުރުމުގެ މަޝްރޫޢުތަކުގެ ތެެރެއިން އަމިއްލަ އިސްނެގުމުގެ މަތިން ސަރުކާރުން ހިންގާ ތަރައްޤީގެ މަޝްރޫޢުތަކުގައި ބައިވެރިވެ އެއްފަސްވާން ބޭނުންވާ ރަށްތަކުގެ ރައްޔިތުންނަށް ވެސް ގެދޮރު އަޅައިދޭނެ ކަމަށެވެ.

ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ރިޔާސީ ވަޢުދުތަކުގެ ތެރެއިން އެންމެ ބޮޑު ވަޢުދަކީ ބޯހިޔާވަހިކަމަށް އޮތް ދަތިތައް ނައްތާލުމެވެ. އެކަން މި ފަސް އަހަރުގެ ދައުރުގެ ތެރޭގައި ޙާޞިލްކުރައްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.