Advertisement
ރައީސުލްޖުމްހޫރިއްުޔާ އިބްރާހީމް މުޙައްމަދު ޞާލިޙް ---
އޯގަސްޓް މަހުގެ ފުރަތަމަ ހަފްތާގެ ތެރޭގައި އިހަވަންދޫ ހޮސްޕިޓަލްގެ މަސައްކަތް ފެށޭނެ ކަމުގައި ރައީސުލްޖުމްހޫރިއްޔާ ވިދާޅުވެއްޖެ
އޯގަސްޓް މަހުގެ ފުރަތަމަ ހަފްތާގެ ތެރޭގައި ހއ. އިހަވަންދޫ ހޮސްޕިޓަލްގެ އިމާރާތުގެ މަސައްކަތް ފެށޭނެ ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، އިއްޔެ ހއ އަތޮލަށް ފެއްޓެވި ކެމްޕޭން ދަތުރުފުޅުގައި ރޭ، އިހަވަންދޫ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ވިދާޅުވީ، އިހަވަންދޫ ހޮސްޕިޓަލްގެ މަސައްކަތް ނުފެށި ލަސްވެގެން ގޮސްފައި ވަނީ ތަފާތު އެކި ސަބަބުތަކާއި ހެދިކަމަށެވެ. އަދި އެ ހޮސްޕިޓަލް އިމާރާތްކުރުމަށް ބޭނުންވާ ފައިސާ ހަމަޖެހި، އަދި ކޮންޓްރެކްޓްވެސް ހަވާލުކުރެވިފައިވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި އެމަސައްކަތް އަވަހަށް ކުރިޔަށް ގެންދިޔުމަށްޓަކައި، ކޮންޓްރެކްޓަރާއި ވާހަކަ ދައްކަމުންދާ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ، އިހަވަންދޫ ބިންހިއްކުމުގެ މަސައްކަތް ނިމުމާއި އެކު އެރަށުގައި އެޅުމަށް ނިންމާފައިވާ މަސްފެކްޓްރީގެ މަސައްކަތްވެސް ފެށިގެންދާނެ ކަމަށެވެ. ރައީސް ވިދާޅުވީ، އިހަވަންދޫއަށް އިތުރުކުރާ 25 ހެކްޓަރުގެ ބިން ހިއްކުމުގެ މަސައްކަތްވެސް މިހާރު ނިމުމަކާއި ހަމައަށް ގޮސްފައިވާ ކަމަށެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް، ހއ އަތޮޅަށް ފެއްޓެވި ދަތުރުފުޅުގައި، މިއަދު މެންދުރުފަހު ވަނީ، ހއ އަތޮޅުގެ އެހެން ބައެއް ރަށްރަށަށްވެސް ވަޑައިގެންފައެވެ.
