ބޭނުން ވަނީ ތިންރަށުގެ ރައްޔިތުންގެ ތަރައްޤީގެ އުއްމީދުތައް ޙާޞިލްކޮށްދިނުން ކަމުގައި ރައްޔިތުންގެ މަޖިލީހުގެ ގުރައިދޫ ދާއިރާގެ މެމްބަރުކަމުގެ ހުވާ މިއަދު ކުރެއްވި އިބްރާހީމް ޝާޒް ވިދާޅުވެއްޖެއެވެ.

ޝާޒް މެމްބަރުކަމުގެ ހުވާ ކުރެއްވުމުގެ ރަސްމިއްޔާތު އޮތީ މިއަދު ހެނދުނު ރައްޔިތުންގެ މަޖިލީހުގެ އިދާރާގައެވެ. ޝާޒްއަށް ހުވައި ލައިދެއްވީ ދިވެހިރާއްޖޭގެ ސްޕްރީމްކޯޓުގެ ފަނޑިޔާރު އަލްއުސްތާޛާ ޢާއިޝާ ޝުޖޫންއެވެ، މިރަސްމިއްޔާތުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދުވެސް ބައިވެރިވެވަޑައިގެންނެވިއެވެ.

ހުވާކުރެއްވުމާއި ހުވާގެ އިޤުރާރުގައި ސޮއެކުރެއްވުމަށްފަހުގައި، ޝާޒް ދެއްވި ބަސްދީ ގަތުމުގައި ވިދާޅުވީ، މަޖިލީހުގައި ބޭކާރު ވާހަދައްކައި ވަގުތު ބޭކާރުކޮށްލުމަށް ފުރުޞަތެއް ނެތް ކަމަށެވެ. އަދި މަޖިލީހުގައި އޭނާއަށް ލިބިފައި އޮތީ ކުރު މުއްދަތެއްކަން ފާހަގަކުރައްވައި، ޝާޒް ވިދާޅުވީ، އޭނާ ދެމި ހުންނަވާނީ ރައްޔިތުންނަށް ވީ ވަޢުދު ފުއްދުމަށް ކަމަށެވެ.

ޝާޒް ވިދާޅުވީ މިއަދު ރައްޔިތުންގެ މަޖިލީހުގެ ގުރައިދޫ ދާއިރާގެ މެމްބަރުކަމުގެ ހުވާ އޭނާ ކުރެއްވުމަކީ، އެމްޑީޕީއަށާއި ދާއިރާގެ ރައްޔިތުންނަށް ލިބިގެންދިޔަ ކާމިޔާާބެއް ކަމަށެވެ.

ރާއްޖޭގައި މަލްޓިޕާޓީ ސިޔާސީ ނިޒާމް ތަޢާރަފްކުރެވި އާއްމު އިންތިޚާބު ބޭއްވި ކޮންމެ ފަހަރެއްގައިވެސް، މިފަހަރު މެނުވީ، ރައްޔިތުންގެ މަޖިލީހުގެ ގުރައިދޫ ދާއިރާގެ ގޮނޑި އެމްޑީޕީއަށް ކާމިޔާބު ކުރެވިފައެއް ނުވެއެވެ. އޭގެ ކުރިން އެގޮނޑި ކާމިޔާބުކޮށްފައި ވަނީ ޑިއާރްޕީއިންނާއި ޕީޕީއެމްއިންނެވެ. ރައްޔިތުންގެ މަޖިލީހުގެ ގުރައިދޫ ދާއިރާގެ ގޮނޑި އެމްޑީޕީއަށް ކާމިޔާބު ކުރެވުމަކީ، ފަޚުރުވެރި ކާމިޔާބެއްގެ ގޮތުގައި އެމްޑީޕީން ފާހަގަކުރެއެވެ.