ޢީދު ބަންދަށްފަހު ރައްޔިތުންގެ މަޖިލީހުގެ ޖަލްސާތައް މާދަމާއި ފެށިގެން ކުރިޔަށްދާނެ ކަމުގައި ރައްޔިތުންގެ މަޖިލީހުގެ އިދާރާއިން ހާމަކުރައްވައިފިއެވެ.

މާދަމާ ބޭއްވުމަށް ހަމަޖައްސަވާފައި ވަނީ، 20 ވަނަ ރައްޔިތުންގެ މަޖިލީހުގެ ފުރަތަމަ ދައުރުގެ 5 ވަނަ ޖަލްސާއެވެ. ޖަލްސާ ފަށާނީ ހެނދުނު 9:00 ގައެވެ.

މާދަމާ ބާއްވާ ރައްޔިތުންގެ މަޖިލީހުގެ ޖަލްސާގެ އެޖެންޑާގައިވާ ގޮތުން މާދަމާއަށް އެޖެންޑާ ކުރެވިފައި ވަނީ އެންމެ ބިލެއްގެ މަސައްކަތެވެ. އެއީ ސަރުކާރުގެ ފަރާތުން، ހެންވޭރު ދެކުނު ދާއިރާގެ މެމްބަރު ޙުސައިން އިމްރާން ލަޠީފް ހުށައަޅުއްވާފައިވާ، ޤާނޫނު ނަމްބަރު 29/2015 (ޞިއްޙީ ޚިދުމަތުގެ ޤާނޫނު)އަށް އިސްލާޙް ގެނައުމުގެ ބިލެވެ. މާދަމާ އޮންނަ ރައްޔިތުންގެ މަޖިލީހުގެ ޖަލްސާގައި ކުރިޔަށް ގެންދިޔުމަށް ހަމަޖައްސާފައި ވަނީ އެބިލްގެ އިބްތިދާޢީ ބަހުޘެވެ.

ރައްޔިތުންގެ މަޖިލީހުގެ ޖަލްސާއެއް އެންމެ ފަހުން ބާއްވާފައި ވަނީ މިހިނގާ ޖޫން މަހުގެ 10 ވަނަ ދުވަހުގައެވެ.