ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، އިހަވަންދޫ ސްކޫލުގެ މަލްޓިޕަރޕަސް ހޯލާއި، ކޮމިއުނިޓީ ސެންޓަރު އަދި ފެނަކަ އޮފީސް އިމާރާތް ހުޅުއްވައި ދެއްވައިފިއެވެ.

މި ޢިމާރާތްތައް ރައީސުލްޖުމްހޫރިއްޔާ ހުޅުއްވައި ދެއްވީ، މިހާރު އެމަނިކުފާނު، ހއ އަތޮލަށް ކުރައްވަމުންދާ ކެމްޕޭން ދަތުރުފުޅުގައި މިއަދު ހަވީރު އެރަށަށް ވަޑައިގެން، އެރަށްރަށުގައި ވަކިވަކިން މިރޭ ބޭއްވި ރަސްމިއްޔާތު ތަކުގައެވެ. މިގޮތުން ރައީސުލްޖުމްހޫރިއްޔާ އެންމެ ފުރަތަމަ ހުޅުއްވައި ދެއްވީ، އިހަވަންދޫ ސްކޫލުގެ މަލްޓިޕަރޕަސް ހޯލެވެ. ފުރަތަމަ އެމަސައްކަތް ހަވާލުކުރެވުނު ކުންފުންޏަށް އެމަސައްކަތް ނުކުރެވުމުން، އެ އިމާރާތުގެ މަސައްކަތް ނިންމާފައި ވަނީ އެމްޓީސީސީއާ ހަވާލުކޮށްގެންނެވެ.

މީގެ އިތުރުން ރައީސުލްޖުމްހޫރިއްޔާ ވަނީ، މިރޭ އިހަވަންދޫ ކޮމިއުނިޓީ ސެންޓަރުވެސް ހުޅުއްވައިދެއްވާފައެވެ. އިހަވަންދޫ ކޮމިއުނިޓީ ސެންޓަރު އިމާރާތްކޮށްފައި ވަނީ، ޓޫއޭ ކޮމްޕެނީ ޕްރައިވެޓް ލިމިޓެޑާއި ހަވާލުކޮށްގެންނެވެ. މިކޮމިއުނިޓީ ސެންޓަރަކީ، ކުޅިވަރު ކުޅުމުގެ އިތުރުން، ޖަމުއިއްޔާތަކަށް މަސައްކަތްކުރެވޭނެ ޖާގަ ތަނަވަސް ކުރެވިފައިވާ އެންމެ ޒަމާނީ ފެންވަރަށް ތަރައްޤީ ކުރެވިފައިވާ ސެންޓަރެކެވެ.

މީގެ އިތުރުން މިރޭ ރައީސުލްޖުމްހޫރިއްޔާ ވަނީ، އިހަވަންދޫ ފެނަކަ އޮފީސް ޢިމާރާތްވެސް ހުޅުއްވައި ދެއްވާފައެވެ. އިހަވަންދޫގައި އިމާރާތްކުރެވުނު ފެނަކަ އޮފީސް ޢިމާރާތަކީ، އެއްފަހަރާ 50 މުވައްޒަފުންނަށް މަސައްކަތް ކުރެވޭ ޖާގަ ތަނަވަސް އޮފީސް ޢިމާރާތެކެވެ.

ރާއްޖޭގެ ރައްޔިތުންގެ ދިރިއުޅުމުގެ ފެންވަރު މަތިކުރުމަށާއި، ފަޚުރުވެރި، އަބުރުވެރި ދިރިއުޅުމެއް އުޅެވޭނެހެން މަގުފަހިކުރުމަށް ތަފާތުކުރުމެއް ނެތި، ރާއްޖޭގެ ރަށްރަށުގައި ސަރުކާރުން ދަނީ ޢުމްރާނީ ތަރައްޤީގެ ގިނަ މަޝްރޫޢުތަކެއް ހިންގަމުންނެވެ.