ާހައްޖުގެ އިންތިޒާމްތައް ގޯސްވުމުން ޠޫނިސްގެ މިނިސްޓަރ އޮފް ރިލިޖަސް އެފެއާޒް ސައްޔިދު އިބްރާހީމްް އަލް ޝައިބީ މަޤާމުން ވަކިކުރައްވައިފިއެވެ.

ޠޫނިސްގެ ރައީސް ޤައިސް ސަޢީދު އެމަނިކުފާނުގެ ކެބިނެޓުން މިނިސްޓަރ އޮފް ރިލިޖަސް އެފެއާޒް ސައްޔިދު އިބްރާހީމްް އަލް ޝައިބީ ވަކި ކުރެއްވީ މިއަދު ކަމުގައި، ޠޫނިސްގެ ރައީސުލްޖުމްހޫރިއްޔާގެ އޮފީހުން ހާމަކުރައްވާފައެވެ. ޝައިބީ މަޤާމުން ވަކިކުރެއްވި އިރު އޭނާ ހުންްނެވީ އެޤައުމުން ހައްޖަށްދިޔަ މީހުންގެ ކަންކަމާއި ހަވާލުވެވަޑައިގެން މައްކާގައެވެ. ޝައިބީ މަޤާމުން ވަކިި ކުރެއްވި ނަމަވެސް އޭނާގެ ބަދަލުގައި ކެބިނެޓަށް އައު ބޭފުޅަކު އަދި ޢައްްޔަނު ކުރައްވާފައެއް ނުވެއެވެ.

ޙައްޖުގެ އިންތިޒާމްތައް ގޯސްވެގެން ޠޫނިސްގެ ރައީސް އެޤައުމުގެ އިސްލާމިކް މިނިސްޓަރު މަޤާމުންވަކިކުރެއްވި އިރު ރާއްޖެއިން މިއަހަރު ހައްޖަށް ދިޔަ މީހުންނަށް އިންތިޒާމްތައް ހަމަޖައްސާފައި ހުރި ގޮތާއިމެދުވެސް ވަނީ ފާޑުކިޔުންތައް އަމާޒުވެފައެވެ. މިގޮތުން މިނާގެ ފޭލިގެތަކުގައި ދިވެހި ހައްޖާޖީން ވަރަށް ބޮޑަށް ތޮއްޖެހިގެން ތިބެންޖެހުނުކަން ފާހަގަކޮށް އެކަމަށް ގިނަ ފަރާތްތަކެއްގެ ފާޑުކިޔުންތައް އަމާޒުވެފައި ވެއެވެ. އަދި އެވީޑިއޯތައްްވެސް ސޯޝަލް މީޑިއާގައި ދަނީ ދައުރުކުރަމުންނެވެ. 

ޙައްޖުގެ އިންތިޒާމްތައް ގޯސްވެގެން އަމާޒުވި ފާޑުކިޔުންތަކަށް ޖަވާބުދެއްވައި އިސްލާމިކް މިނިސްޓަރ  ޑރ. މުޙައްމަދު ޝަހީމް ޢަލީ ސަޢިދު ވިދާޅުވީ ހައްޖުގެ އިންތިޒާމްތައް މިއަހަރަށްވުރެ މިއަންނަ އަހަރު ރަނގަޅުކުރެއްވުމަށް މަސައްކަތް ކުރައްވާނެ ކަމަށެވެ.