ކުށުގެ ޒިންމާ އުފުލަން ޖެހޭ އުމުރު ދަށްކުރުމަކީ، ކުޑަކުދިން ކުށްކުރާ މައްސަލައަށް އޮތް ހައްލެއް ނޫން ކަމުގައި ޕްރޮސެކިއުޓަރ ޖެނެރަލް ޙުސައިން ޝަމީމް ވިދާޅުވެއްޖެއެވެ.

ޕީޖީ ޝަމީމް މިހެން ވިދާޅުވީ، އެމަނިކުފާނުގެ އަމިއްލަފުޅު ބުލޮގްގައި އެކަމާއި ގުޅޭ ގޮތުން ލިޔުއްވި ލިޔުވުމެއްގައެވެ.

ޕީޖީ ހުސައިން ޝަމީމް ވިދާޅުވީ، ކުށްކުރާ ކުޑަކުދިންގެ މައްސަލައަކީ ދިވެހިރާއްޖޭގެ ޖިނާއީ ޢަދުލުގެ ނިޒާމުގައި އަދި ޙައްލެއް ހޯދިފައިނުވާ މައްސަލައެއް ކަމަށެވެ. އަދި ދިވެހިރާއްޖޭގައި ކުށްކުރާ ކުދިންނާބެހޭ ފުރިހަމަ ދިރާސާއެއް ހެދިފައެއް ނެތްކަންވެސް އެމަނިކުފާނު ވަނީ ފާހަގަކުރައްވާފައެވެ.

ޕީޖީ ޙުސައިން ޝަމީމް ވިދާޅުވީ، ބޮޑެތި މީހުން ކުށްކުރާ ސަބަބުތަކާއި ކުޑަކުދިން ކުށް ކުރާ ސަބަބުތައް ތަފާތު ކަމަށެެވެ. މިގޮތުން އެމަނިކުފާނު ލިޔުމުގައި ފާހަގަކުރައްވާފައި ވަނީ، ދިވެހިރާއްޖޭގައި ކުޑަކުދިން ކުށްކުރާކަމަށް ފެންނަނީ، އެކުދިންގެ މާޙައުލުން އެކަމަށް ހިތްވަރު ލިބޭތީ ކަމަށެވެ. އެހެންކަމުން، ކުޑަކުދިން ކުށްކުރުމުން ދުރުހެލިކުރުމަށްޓަކައި ކުރަންވީ އެއްކަމަކީ ކުށުގެ ނުރައްކަލަށް ހުށަހެޅިފައިވާ ކުދިން ތިބި މާޙައުލު ބަދަލުކުރެވޭތޯ ބެލުން ކަމުގައިވެސް އެމަނިކުފާނު ވިދާޅުވިއެވެ. އަދި މާޙައުލު ބަދަލުކުރުމަށްކުރާ އިންވެސްޓްމަންޓަކީ ކުއްޖަކު ޖަލުގައި ބަންދުކުރުމަށް ހިނގާ ޚަރަދަށްވުރެ ކުޑަ، އޭގެ ނަތީޖާ މާ ރަނގަޅުވާނެ އިންވެސްޓްމަންޓަކަށް ވާނޭ ކަމަށް އެމަނިކުފާނަށް ފެނިވަޑައިގަންނަވާ ކަމުގައިވެސް ޕީޖީ ޝަމީމް ވިދާޅުވެފައި ވެއެވެ.

ކުޑަކުދިން ޖިނާޢީ ކުށުގެ ޒިންމާ އުފުލަން ޖެހޭ އުމުރު 15 އަހަރުން 12 އަހަރަށް ދައްކުރަން ސަރުކާރުން މަސައްކަތް ކުރަމުންދާކަމުގައި، ބަންޑާރަ ނައިބު އަޙްމަދު ޢުޝާމް ހާމަކުރެއްވީ ހުސްވި އޭޕްރީލް މަހުގެ ތެރޭގައެވެ.

ސަރުކާރުން މިދައުރުގެ ތެރޭގައި އިސްލާޙް ގެނައުމަށް ކަނޑައަޅާފައިވާ ޤާނޫނު ތަކުގެ ތެރޭގައި، ކުޑަކުދިންގެ ޢަދުލުގެ ޤާނޫނުވެސް ހިމެނެއެވެ.

ޕީޖީ ޙުސައިން ޝަމީމް ހާމަކުރައްވާފައިވާ ގޮތުގައި، ކުށްކުރުމާ ގާތަށް ދެވިދާނެކަމަށް ފެންނަ 200 ވަރަކަށް ކުދިން ރާއްޖޭގައި އެބަ އުޅެއެވެ. އަދި އެއީ ޤައުމީ މައްސަލައަކަށް ވުމަކީ ދުރުގައި އޮތް ކަމެއް ނޫންކަންވެސް އެމަނިކުފާނު ވަނީ ފާހަގަ ކުރައްވާފައެވެ.