އިންޑިއާގެ މުމްބާއީގައި ދެފްލައިޓް މުޑިނާރައި ކިރިޔާ ސަލާމަތްވި ހާދިސާއަކާއި ގުޅިގެން، އެއަރޓްރެފިކް ކޮންޓްރޯލަރު ސަސްޕެންޑްކޮށް އިންޑިއާގެ ސިވިލްއޭވިއޭޝަނުން ހާދިސާގެ ތަޙްޤީޤު ފަށައިފިއެވެ.

އިންޑިއާގެ މީޑިއާތަކުން ރިޕޯޓްކޯށްފައިވާ ގޮތުގައި އެކަން ހިނގާފައި ވަނީ، މި ޖޫން މަހުގެ 8 ވަނަ ދުވަހުއެވެ. އެ މަންޒަރުގެ ވީޑިއޯތައް ސޯޝަލް މީޑިއާގައި ދަނީ ދައުރުވަމުންނެވެ.

އިންޑިއާގެ މީޑިއާތަކުން ރިޕޯޓްކޮށްފައިވާ ގޮތުގައި ދެ ރަންވޭއެއް އޮންނަ މުމްބާއީ އެއާޕޯޓުގައި އިންޑިގޯ ފްލައިޓް ޖެއްސީ އެއަރ އިންޑިއާ ފްލައިޓް ޓޭކްއޮފް ކުރިތާ އެންމެ 3 ސިކުންތުގެ ތެރޭގައި ހަމަ އެރަންވޭ އަށެެވެ. އަދި ދެފްލައިޓް 1679 ފޫޓަށް ކައިރިވިއެވެ. އެ ދެފްލައިޓަކީވެސް އެއާބަސް 320 މަރުކާގެ ދެ ބޯޓެވެ.

އިންޑިއާގެ އެއާޕޯޓްތަކުގައި އައިކާއޯގެ ވައިގެ ދަތުރުފަތުރުގެ ސަލާމަތީ މިންގަނޑާއި ޚިލާފަށް އަމަލުކުރާ މައްސަލަތައް މީގެ ކުރިންވެސް އިންޑިއާގެ މީޑިއާތަކުން ރިޕޯޓްކޮށްފައި ވެއެވެ.

ވައިގެ ތެރޭގައި ދެ މަތިންދާ ބޯޓެއް މުޑިއެރުމުގެ އެންމެ ބޮޑު ހާދިސާއެއް ދުނިޔޭގެ ވައިގެ ދަތުރުފަތުރުގެ ތާރީޚުގައިވެސް ހިނގާފައި ވަނީ އިންޑިއާގައެވެ. 1996 ވަނަ އަހަރުގެ ނޮވެމްބަރު މަހުގެ 12 ވަނަ ދުވަހު، ސައުދިއާ ފްލައިޓް 763 އާއި ކަރަކިސްތާން އެއާލައިން ފްލައިޓް 1907 ވައިގެ ތެރޭގައި މުޑިއަަރައި ދެބޯޓު ފުނޑުފުނޑުވީ އިންޑިއާގެ ހަރިޔާނާގެ ސިޓީއެއްގެ 9000 ފޫޓު މަތީގައެވެ. އެހާދިސާގައި އެ ދެފްލައިޓްގައި ތިބި 349 މީހުން މަރުވިއެވެ.