ދައުލަތުގެ ބެލުމުގެ ދަށުގައި، ކ. ގުރައިދޫ މަރުކަޒުގައި ތިބި ފަރާތްތަކަށް ޚާއްޞަކޮށްގެން އުފާވެރި ރާސްތާގެ ނަމުގައި، އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ޚާއްޞަ ޕްރޮގްރާމެއް ފަށައިފިއެވެ.

އެވުޒާރާއިން ވިދާޅުވީ، އެޕްރޮގްރަމަކީ، ކ. ގުރައިދޫ ޚާއްސަ އެހީއަށް ބޭނުންވާ މީހުންގެ މަރުކަޒުގައި ތިބި ހިނގާ ބިނގާވެ އުޅެވޭ ފަސްދޮޅަސް އިސްރަށްވެހީންނަށް ހިންގާ ޕްރޮގްރާމެއް ކަމަށެވެ. އަދި އެ ޕްރޮގްރާމަކީ ދުވަސްވީ މީހުންގެ ތެރެއިން މަރުކަޒުކުރެވިފައިވާ ފަރާތްތަކަށް އިޖުތިމާޢީ ހަރަކާތްތަކާއި އެކު ހިންގޭ މަޢުލޫމާތު ސެޝަންތަކެއް ކަމުގައިވެސް އެވުޒާރާއިން ވިދާޅުވިއެވެ.

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވިދާޅުވީ، ޕްރޮގްރާމްގައި މަޢުލޫމާތު ދެއްވަނީ އެކި ދާއިރާ ތަކުގައި މަސައްކަތްކުރައްވަމުން ގެންދަވާ ފަންނީ ބޭފުޅުން ކަމަށެވެ. މިގޮތުން މި ޕްރޮގްރާމްގައި މަޢުލޫމާތު ދެއްވާފައި ވަނީ ނަރުހުންނާއި ސޯޝަލް ވާކަރުންކަމުގައިވެސް އެވުޒާރާއިން ވިދާޅުވިއެވެ.

އެވުޒާރާއިން ވިދާޅުވީ، މި ޕްރޮގްރާމް ހިންގުމުގެ މަޤުސަދަކީ އުމުރުން ދުވަސްވީ މީހުންގެ ތެރެއިން އެ މަރުކަޒުގައި ޚިދުމަތް ހޯދާފަރާތްތައް މުޖްތަމައަށް ނެރުމަށް އަހުލުވެރި ކުރުވުމާއި، ދުޅަހެޔޮ ޞިއްޙަތެއްގައި ތިބުމަށް އެހީތެރިވެދިނުންކަކަމަށެވެ.  މިއަދު ކުރިޔަށް ގެންދިޔަ ސެޝަންގައި މަޢުލޫމާތު ދީފައިވަނީ ދުޅަހެޔޮޞިއްޙަތެއްގައި ތިބުމަށް ކޮންމެ ދުވަހަކު ކުރެވޭނެ ކަސްރަތުތަކާއި، މިންހެޔޮ ކާނާ އާއި ނަފްސާނީ ގޮތުން ދުޅަހެޔޮކޮށް ތިބުމަށް އަހަމިއްޔަތުކަން ދިނުމުގެ މުހިއްމު ކަމުގެ މައްޗަށެވެ. މި ޕްރޮގްރާމްގައި ޖުމްލަ 60 މީހުން ވަނީ ބައިވެރި ކުރެވިފައި ކަމުގައިވެސް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވިދާޅުވެފައިވެއެވެ.