އިންޑިއާގެ ބޮޑުވަޒީރު ނަރެންދުރަ މޯދީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ޢީދުގެ ތަޙްނިޔާ އާއި ހެޔޮ އެދުންތައް ފޮނުއްވައިފިއެވެ.

ރާއްޖޭގައި ހުންނަ އިންޑިއާގެ ހައިކޮމިޝަނުން ހާމަކުރައްވާފައިވާ ގޮތުގައި، ރައީސުލްޖުމްހޫރިއްޔާއަށް އިންޑިއާގެ ބޮޑު ވަޒީރު ނަރެންދުރަ މޯދީ ފޮނުއްވި ތަޙްނިޔާގެ މެސެޖުގައި، ދިވެހި ސަރުކާރާއި ރައްޔިތުންނަށް އަޟްޙާ އީދުގެ ހެޔޮ އެދުމާއި ތަޙްނިޔާ ފޮނުއްވާފައިވެއެވެ.

އިންޑިއާގެ ބޮޑުވަޒީރުގެ މެސެޖުގައި، މިއަދު ފާހަގަކުރާ އުފާވެރި ޢީދު ދުވަހުން ހަނދާނަށް ގެނެސްދެނީ، އަޅުގަނޑުމެން އެންމެން އުއްމީދުކުރާ ޞުލުޙަވެރި އަދި އެންމެން ޝާމިލްވާ ދުނިޔެއެއް ބިނާކުރުމުގެ ބޭނުންތެރިކަމާއި އެކުވެރިކަމާއި އެއްބައިވަންތަކަން ކަމުގައި ވިދާޅުވެފައިއެވެ.

އަދި އިންޑިއާގައި އޮތް މަލްޓިކަލްޗަރަލް ސަޤާފަތްތަކުގެ ތެރެއިން ފޯރިއާ އުފާވެރި ކަމާއި އެކު ފާހަގަކުރެވޭ ދުވަހެއް ކަންވެސް އިންޑިއާގެ ބޮޑުވަޒީރުގެ މެސެޖުގައި ފާހަގަކުރައްވާފައިވެއެވެ.

ޢީދުގެ ތަޙްނިޔާ ވިދާޅުވެ އިންޑިއާގެ ބޮޑުވަޒީރު މިފަދަ މެސެޖެއް ފޮނުއްވި އިރު، ބޭރު ޤައުމުތަކުގެ ސަޤާފަތްތަކާއި އެއްގޮތަށް ރާއްޖޭގައި ޢީދު ފާހަގަކުރުމުގެ ކަންކަން ހިނގަމުންދާތީ އެކަމުގެ ކަންބޮޑުވުން، އީދާއި ގުޅިގެން ފޮނުއްވި ތަޙްނިޔާގެ ޚިޠާބުގައި ރައީސް ފާހަގަކުރައްވާފައިވެއެވެ.