1445 ވަނަ އަހަރުގެ އަޟްޙާ ޢީދުގެ ކުޅިވަރުތައް ފެށުމުގެ ގޮތުން، ރޯކޮށްލުމަށް ފުވައްމުލައް ސިޓީކައުންސިލުން ތައްޔާރުކުޅި އީދުމަޅި ބަޔަކު ވަގަށް ރޯކޮށްލާފައިވާ ކަމުގައި، ފުވައްމުލަކު ސިޓީ ކައުންސިލުން ބުނެފިއެވެ.

އީދު ގެ ހަރަކާތްތައް ފެށުމުގެ ގޮތުން ރޭގައި ރޯކުރުމަށް ފުވައްމުލައް ސިޓީ ކައުންސިލުން ތައްޔާރު ކުރި އީދުޅި ބަޔަކު ވަގަށް ރޯކޮށްލާފައިވާތީ، ސިޓީ ކައުންސިލުން ވަނީ އެކަން ކުއްވެރިކަޮށްފައެވެ. 

ފުވައްމުލައް ސިޓީ ކައުންސިލުން ނެރުނު ބަޔާނުގައި ބުނެފައި ވަނީ، އެކަމަކީ އެކައުންސިލުން ނުހަނު ބޮޑަށް ކަންބޮޑުވާ އަދި ކުއްވެރިކުރާ ޢަމަލެއް ކަމަށެވެ. އަދި ރަށުގެ އިޖުތިމާޢީ ގުޅުމާއި އެކުވެރިކަން އާލާކުރުމަށް ހިންގޭ މިފަދަ ހަރަކާތްތަކަށް ހުރަސް އެޅޭ ގޮތަށް ޢަމަލު ކުރުން އެކައުންސިލުން ކުއްވެރިކުރާ ކަމުގައި ވެސް ސިޓީކައުންސިލުން ނެރުނު ބަޔާނުގައި ބުނެފައިވެއެވެ. 

ފުވައްމުލައް ސިޓީ ކައުންސިލްގެ ބަޔާނުގައި ބުނެފައި ވަނީ، ރައްޔިތުންގެ ހެވާއި ލާބައަށް ކުރެވޭ މިފަދަ ކަންތައްތަކާިއ އެނޫންވެސް އެއްވެސް ފަރުދަކަށް ގެއްލުމެއް ނުވަތަ ދެރައެއް ލިބިދޭ ޢަމަލުތައް ނުކުރުމަށާއި، އެފަދަ އަމަލުތަކަށް އެއްވެސް ގޮތަަކަށް ހިއްވަރު ނުދިނުމަށް އިލްތިމާސް ކުރާ ކަމަށެވެ.

1445 ވަނަ އަހަރުގެ ޢީދު ކުޅިވަރުތައް ފެށުމުގެ ގޮތުން ރޯކޮށްލުމަށް ތައްޔާރުކުރި އީދު މަޅި ބަޔަކު ވަގަށް ރޯކޮށްލުމުންވެސް އަލުން އީދު މަޅި ތައްޔާރުކޮށް، ސިޓީ ކައުންސިލުން ވަނީ އެހަރަކާތް ރޭގައި ކުރިޔަށް ގެންގޮސްފައެވެ. ފުވައްމުލަކުގައި ކުރިޔަށް ގެންދިޔަ އެހަރަކާތް ބަލާލުމަށް ރަށުގެ ކުދިބޮޑު ރައްޔިތުން ޖަމާވިއެވެ.