މިއަހަރުގެ އަޟްޙާ ޢީދު ކުލަގަދަ ގޮތެއްގައި ފާހަގަކުރުމަށް އެޗްޑީސީން ހުޅުމާލޭގައި ކުރިޔަށް ގެންދިޔުމަށް ރާވާފައިވާ އީދު ކުޅިވަރުތައް ރޭ ފަށައިފިއެވެ.

އެޗްޑީސީގެ ޢީދު ކުޅިވަރުތައް ފަށާފައި ވަނީ ރޭ، ޢީދު ވެދުމާ ދިޔުމާއި ޢީދު ހުޅުންނެވެ. ވެދުމާ ދިޔުމުގެ ހަރަކާތް ކުރިޔަށް ގެންގޮސްފައި ވަނީ އެޗްޑީސީގެ ހެޑް އޮފީސް ކުރިމަތިން އިރަށް ގޮސް، ނިރޮޅުމަގުން އުތުރަށް ގޮސް ހުޅުމާލެ ދިރާގު ހެޑް އޮފީހާއި ދިމާއިން ބީޗަށެވެ. 

ޢީދުގެ ކުޅިވަރުތައް ފެށުމުގެ ގޮތުން ޢީދު ބޮޑުހުޅުގެ ނަމުގައި، ޢީދުމަޅި ރޯކުރުމުގެ ހަރަކާތެއްވެސް އެޗްޑީސީން ރޭ ކުރިޔަށް ގެންގޮސްފައިވެއެވެ. މިހަރަކާތް ކުރިޔަށް ގެންގޮސްފައި ވަނީ ހުޅުމާލެ ފޭސް 1 އާއި ފޭސް 2 ގުޅުވައިދޭ އިރުމަތީ ބުރިޖާއި ދިމާއިން މޫދުގައެވެ. މިހަރަކާތް ބަލާލުމަށް ހުޅުމާލޭގައި ދިރިއުޅޭ އެތައް ހާސް ބަޔަކު ރޭ އެސަރަހައްދަށް ޖަމާވިއެވެ.

އެޗްޑީސީން ހާމަކޮށްފައިވާ ގޮތުގައި މިއަދު ހަވީރާއި މިރޭވެސް ޢީދާއި ގުޅުގެން ކުރިޔަށް ގެންދާ ހަރަކާތްތައް އޮންނާނެއެވެ. މިގޮތުން މިއަދު ހަވީރު އޮންނާނީ، ގްރީސް ޕޯލް އާއި ކުޑަކުދިންގެ ހަވީރާއި، މާލި ޕެރޭޑެވެ. މިހަރަކާތްތައް އޮންނާނީ ހުޅުމާލެ ސިންތެޓިކް ޓްރެކްގައެވެ.

މީގެ އިތުރުން މިރޭ، ހުޅުމާލެ ސެންޓްރަލް ޕާކުގައި ބޮޑު މަސްބޭނުމާއި، ހަވާއެރުވުންވެސް އޮންނާނެކަމުގައި އެޗްޑީސީން ހާމަކޮށްފައިވެއެވެ.

ޢީދުގެ ހަރަކާތްތައް މާދަމާ ނިންމާލާއިރު، މާދަމާ ހަވީރުވެސް ކޯޑި ކެނޑުމާއި ކުޑަކުދިންގެ ހަވީރު، ސެންޓްރަލް ޕާކުގައި އޮންނާނެއެވެ. އެންމެ ބޮޑު ހަރަކާތަކަށް މާދަމާރޭ އޮންނާނީ ހުޅުމާލެ ސެންޓްރަލް ޕާކުގައި ބާއްވާ، ދިރާގު ޢީދު ޝޯވ އެވެ. މިދިޔަ އަހަރުންފެށިގެން ދިރާގުން ކުރިޔަށް ގެންދަން ފެށި ދިރާގު ޓެސްލާ ވިން ޕްރޮމޯޝަންގައި، ދިރާގުންދޭ ޓެސްލާ ކާރު ލިބޭ ފަރާތް ހޮވުން މާދަމާރޭ ބާއްވާ ދިރާގު ޢީދު ޝޯވގައި އޮންނާނެއެވެ.