މިދައުރުގައި މިހާތަނަށް 12 މިސްކިތެއް ބިނާކުރެވިފައިވާ ކަމަށާއި، އަދި 19 މިސްކިތެއްގެ މަސައްކަތް ހިނގަމުންދާކަމުގައި އިސްލާމިކް މިނިސްޓަރ ޑރ. އަޙްމަދު ޒާހިރު ޢަލީ ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އައްޑޫ ސިޓީ މީދޫގައި ސަރުކާރުން ޢިމާރާތްކޮށްދެއްވާ އައު މިސްކިތުގެ މަސައްކަތް ޢަމަލީ ގޮތުން ފައްޓަވައި ދެއްވައި ދެއްކެވި ވާހަކަފުޅުގައެވެ.

އިސްލާމިކް މިނިސްޓަރ ޑރ އަޙްމަދު ޒާހިރު ޢަލީ ވިދާޅުވީ،  ކޮންމެ މިސްކިތެއްގެވެސް މަސައްކަތް ހަވާލުކުރެވެމުން އަންނަނީ 1 އަހަރުގެ ތެރޭގައި މަސައްކަތް ނިންމުމަށް ކަމަށެވެ. އަދި މިސްކިތްތައް ބިނާކުރުމަށް ހަވާލުކުރެވޭ ކޮންޓްރެކްޓަރުންނަށް މުއްދަތައް މަސައްކަތް ނުނިންމޭކަން ފާހަގަކުރައްވައި މިނިސްަޓަރ ވިދާޅުވީ، މިސްކިތްތައް ބިނާކުރެއްވުމަށް ސަރުކާރުން ކުރައްވާ މަސައްކަތްކުރިއަށް ގެންދިޔުމަށްޓަކައި، މަސައްކަތުގެ ކޮންޓްރެކްޓަރުންވެސް އެހީތެރިކަންދީ، އެއްބަސްވެފައިވާ މުއްދަތަށް އެ މަސައްކަތް ނިންމަންޖެހޭކަމަށެވެ.

މިސްކިތްތަކަކީ ރަށެއްގެ ރައްޔިތުންގެ ވަރަށް ބޮޑު އުންމީދެއް އެކަމުގައި އެކުލެވިގެންވާ ބިނާއަކަށްވާއިރު މިސްކިތްތައް ބިނާކުރުމަށް ދެވޭ މުއްދަތަކީވެސް ވަކިގޮތަކަށް ބަލައިގެންދެވޭ މުއްދަތެއްކަން މިނިސްޓަރ ފާހަގަކުރެއްވިއެވެ. އެގޮތުން ކަނޑައަޅާފައިވާ މުއްދަތުގައި މަސައްކަތް ނުނިމި ދިގުލައިގެން ދިޔުމުގެ ސަބަބުން އެރަށެއްގައި ބިނާކުރުމަށް ކަނޑައެޅޭ މިސްކިތުގެ ޖާގަކުޑަވުމުގެ މައްސަލަ ދިމާވާކަމަށް މިނިސްޓަރ ވިދާޅުވިއެވެ.

އެހެންކަމުން ކަނޑައަޅާފައިވާ މުއްދަތަށް މިސްކިތްތަކުގެ މަސައްކަތް ނިންމުމަކީ މުހިންމުކަމެއްކަން މިނިސްޓަރ ވަނީ ފާހަގަކުރައްވާފައެވެ.

މިދައުރުގެ ތެރޭގައި ކޮންޓްރެކްޓަރުންނަށް 31 މިސްކިތެއް ޢިމާރާތްކުރުމުގެ މަސައްކަތް ހަވާލުކުރެވުނު އިރު މިހާތަނަށް ނިންމިފައި ވަނީ 12 މިސްކިތެވެ.