ސިންގަޕޫރުގައި މިހާރު ކުރިއަށްދާ އެޤައުމުގެ 19 ވަނަ ޤައުމީ ފެތުމުގެ މުބާރާތުގައި އަންހެނުންގެ ލޯންގްކޯސް 100 މީޓަރ ބަޓަރފްލައި އިވެންޓުގެ ދިވެހި ރާއްޖޭގެ ޤައުމީ ރެކޯރޑް އާކޮށްފިއެވެ. މި ރެކޯޑު އާކޮށްފައިވަނީ ކުރިން ވެސް މި ރެކޯޑު އޮތް މިރާލް ޢައިން ލަތީފްއެވެ.

މިރާލް މި އިވެންޓުން ޤައުމީ ރެކޯޑު އާކޮށްފައި ވަނީ 01:13.96 އިން ރޭސް ފުރިހަމަކޮށްގެންނެވެ. އޭނާ މި ރެކޯޑު އެންމެ ފަހުން އާކުރީ2023 ވަނަ އަހަރު ބޭއްވުނު 19 ވަނަ އޭޝިއަން ގޭމްސްގައި 01:13.99 އިން ރޭސް ފުރިހަމަކޮށްގެންނެވެ.

މި ރެކޯޑުގެ އިތުރުން މިރާލް ހަދާފައިވާ އެހެން ރެކޯޑުތަކަކީ، އަންހެނުންގެ ލޯންގްކޯސް 200 މީޓަރ ބަޓަރފްލައި އިވެންޓުގެ ޤައުމީ ރެކޯރޑާއި، ލޯންގްކޯސް 200 މީޓަރު އިންޑިވިޖުއަލް މެޑްލޭގެ ރެކޯޑާއި، ލޯންގްކޯސް 400 މީޓަރު އިންޑިވިޖުއަލް މެޑްލޭގެ ރެކޯޑާއި، ޝޯޓްކޯސް 50 މީޓަރު ބަޓަފްލައިގެ ރެކޯޑާއި، ޝޯޓްކޯސް 100 މީޓަރު ބަޓަފްލައިގެ ރެކޯޑާއި، ޝޯޓްކޯސް 200 މީޓަރު ބަޓަފްލައިގެ ރެކޯޑުގެ އިތުރުން ޝޯޓްކޯސް 200 މީޓަރު އިންޑިވިޖުއަލް މެޑްލޭގެ ރެކޯޑެވެ.