ޢީދު ދުވަހާއި ގުޅިގެން، މާދަމާ ހަވީރު ފައިމަގުގައި އުޅޭ ގޮތަށް ހަމަޖައްސައިފިއެވެ.

މާލޭ ސިޓީކައުންސިލުން ވިދާޅުވީ، ޢީދާއި ގުޅިގެން މާދަމާ ހަވީރުގެ 4:00އިން 6:00އަށް މާލާގެ މަގުތަކުގައި އިންޖީނުލީ އެއްގަމު އުޅަނދު ފަހަރު ދުއްވުން މަނާކޮށްފައިވާ ކަމަށެވެ.

އީދު ދުވަހު މާލޭގައި އިންޖީނުލީ އެއްގަމު އުޅަނދު ފަހަރު ދުއްވުން މަނާކޮށްފައި ވަނީ، ބުރާސްފަތު ދުވަހު ބޭއްވި މާލޭ ސިޓީ ކައުންސިލްގެ މިދައުރުގެ 150 ވަނަ ބައްދަލުވުމުގައެވެ.

އެއްގަމު އިންޖީނުލީ އެއްގަމު އުޅަނދު ދުއްވުން މަކޮށްފައިވާ ވަގުތުތަކުގައިވެސް ޚާއްޞަ ހުއްދައެއްގެ ދަށުން ބައެެއް އުޅަނދު ފަހަރު ދުއްވޭނެއެވެ. މިހުއްދަ ދޫކުރަނީ، މާލެ ސިޓީ ކައުންސިލުގެ އާންމު ޚިދުމަތާ ބެހޭ ބައިން ކަމުގައިވެސް ސިޓީ ކައުންސިލުން ހާމަކުރައްވާފައިވެއެވެ.

މާދަމާ ހަވީރު، މާލޭގައި އިންޖީނުލީ އެއްގަމު އުޅަނދުފަހަރު ދުއްވުން މަނާކުރި ނަމަވެސް، ސިޓީ ކައުންސިލުން ހުއްދަދޭ އުޅަނދުތަކާއި، ސަލާމަތީ ޚިދުމަތްތަކުގެ ހަތަރު ފުރޮޅުލީ އެއްގަމު އުޅަނދުތައް ދުއްވުމުގެ ހުއްދަ އޮންނާނެއެވެ.

އެއްގަމު އިންޖީނުލީ އުޅަނދު ފަހަރު ދުއްވުން މަނާކުރެވިފައިވާ ވަގުތުގައި، ކޮންމެހެން ދަތުރުކުރަންޖެހޭ ހާލަތެއް ނުވަތަ ޟަރޫރަތެއް އޮވެގެން އެވަގުތުގައި ދަތުރުކުރަންޖެހޭ އުޅަނދުތަކަށް ހުއްދަ ދޫކުރުން، މާލެ ސިޓީ ކައުންސިލުގެ އާންމު ޚިދުމަތާ ބެހޭ ބައި (ތައިސޭ ކޮށީގައި) މިރޭގެ 9:00އިން 11:00އަށް ކުރިޔަށް ގެންދާނެއެވެ.