ތަރައްޤީވަމުން އަންނަ ކުދި ޖަޒީރާ ޤައުމުތަކުގެ ހަތަރުވަނަ ބައިނަލްއަޤްވާމީ މަހާސިންތާގައި ބައިވެރިވެ ވަޑައިގެންނެވުމަށް، އެންޓީގާ އެންޑް ބާބިޔުޑާއަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ކުރެއްވި ދަތުރުފުޅަށް، 3.8 މިލިޔަން ރުފިޔާ ޚަރަދުވިކަމުގައި ރައީސުލްޖުމްހޫރިއްޔާގެ އޮފީހުން ވިދާޅުވެއްޖެއެވެ.

ރައީސުލްޖުމްހޫރިއްޔާ ރާއްޖެއިން ބޭރަށް ކުރައްވާ ދަތުރުފުޅުތަކަށް ހިނގާ ޚަރަދުތައް އާއްމުކުރެއްވުމަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅުތަކުގެ ތެރޭގައި ހިމެނޭ ކަމެކެެވެ. މިގޮތުން ދަތުރުފުޅު ނިމޭތާ ގިނަވެގެން 15 ދުވަހުގެ ތެރޭގައި އެމައުލޫމާތު އާއްމު ކުރައްވަމުން ގެންދަވައެވެ.

ތަރައްޤީވަމުން އަންނަ ކުދި ޖަޒީރާ ޤައުމުތަކުގެ ހަތަރުވަނަ ބައިނަލްއަޤްވާމީ މަހާސިންތާގައި ބައިވެރިވެ ވަޑައިގެންނެވުމަށް، އެންޓީގާ އެންޑް ބާބިޔުޑާއަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ކުރެއްވި ދަތުރުފުޅު ނިންމަވާލެއްވުމަށްފަހުގައި މާލެ ވަޑަިއގެންނެވީ، ހުސްވި މެއި މަހުގެ 31 ވަނަ ދުވަހުގައެވެ. ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި މުޅި ދަތުރުފުޅަށް ޚަރަދުވެފައި ވަނީ، 3،864،414.94ރ ( ތިން މިލިޔަން އަށްލައްކަ ފަސްދޮޅަސްހަތަރުހާސް ހަތަރުސަތޭކަ ސާދަރުފިޔާ ނުވަދިހަހަތަރު ލާރި) އެވެ.

އޭގެ ތެރޭގައި ހިމެނެނީ އެދަތުރުފުޅުގައި ބައިވެރިވެވަޑައިގެންނެވި ވަފުދުގައި ހިމެނޭ 16 މީހުންގެ ޓިކެޓަށް ޚަރަދުވި، 2.6 މިލިޔަން ރުފިޔާ އާއި އެހެނިހެން ޚަރަދުތަކެވެ.

އެންޓީގާ އެންޑް ބާބިޔުޑާއަކީ، ކެރީބިއަންގެ ޤައުމެކެވެ. ރާއްޖެއިން އެ ޤައުމަށް ފްލައިޓްގައި ކުރާ ދަތުރަށްވެސް 36 ގަޑިއިރު ހޭދަވެއެވެ. ރައީސުލްޖުމްހޫރިއްޔާގެ މިދަތުރުފުޅަށް 8 ދުވަސް ހޭދަވިއެވެ.