މިދައުރުގެ ތެރޭގައި ސަރުކާރުން ރައްޔިތުންގެ މަޖިލީހަށް 213 ބިލެއް ހުށައަޅުއްވާނެ ކަމުގައި ބަންޑާރަ ނައިބު އަޙްމަދު އުޝާމް ވިދާޅުވެއްޖެއެވެ.

އިއްޔެ ބަންޑާރަ ނައިބުގެ އޮފީހުގައި ނޫސްވެރިންގެ ބައްދަލުވުމުގައި ވަނީ، ސަރުކާރުގެ ލެޖިސްލޭޓިވް އެޖެންޑާ އާއި ގުޅޭ މައުލޫމާތުތައް ހާމަކުރައްވާފައެވެ. އިއްޔެ ސަރުކާރުގެ ލެޖިސްލޭޓިވް އެޖެންޑާ އާއްމުކޮށް ޝާއިއު ކުރައްވާފައި ވާއިރު، މި ފަސް އަހަރުގެ ދައުރުގެ ތެރޭގައި، 213 ބިލެއް ރައްޔިތުންގެ މަޖިލީހަށް ހުށައެޅުމަށް ނިންމާފައި ވަނީ، 15 ދާއިރާއަކުން ކަމުގައިވެސް ބަންޑާރަ ނައިބުގެ އޮފީހުން ވިދާޅުވެފައިވެއެވެ.

މިގޮތުން ސަރުކާރުގެ ލެޖިސްލޭޓިވް އެޖެންޑާގައި ހިމެނޭ މައިގަނޑު ދާއިރާތަކުގެ ތެރޭގައި، ދުސްތޫރީ އަދި ޤާނޫނީ ދާއިރާ، ދައުލަތް ހިންގުމުގެ ދާއިރާ، ޙައްޤުތަކާއި މިނިވަންކަމުގެ ދާއިރާ، އިސްލާމީދާއި ޤައުމިއްޔަތުގެ ދާއިރާ، އަދި ޤައުމީ ސަލާމަތާއި ޚާރިޖީ ގުޅުންތަކުގެ ދާއިރާތައް ހިމެނެއެވެ. 

މީގެ އިތުރން ކޮރަޕްޝަން ހުއްޓުވުމާއި، އާއިލާ އާއި މުޖުތަމަޢު އަދި ސިއްޙަތާއި ދުޅަހެޔޮކަމާއި ތިމާވށީގެ އިތުރުން، ވިޔަފާރިއާ އިޤުތިޞާދުގެ ދާއިރާ ހިމެނެއެވެ. އަދި ފައިސާ އާއި މާލީ ކަންކަމާއި ބިމާއި މުދަލާއި ޢުމުރާނީ ތަރައްޤީގެ އިތުރުން ދަތުރުފަތުރާއި މުވާޞަލާތާއި، ތަޢުލީމާއި މަސައްކަތްތެރިކަމުގެ ދާއިރާގެ އިތުރުން، ޒަމާނާއި ނުގުޅޭތީ އުވާލަންޖެހޭ ނުވަތަ އިސްލާޙް ކުރަންޖެހޭ ޤާނޫނުތައް އިސްލާޙް ކުރުންވެސް ލެޖިސްލޭޓިވް އެޖެންޑާގެ މައިގަނޑު ދާއިރާތަކުގެ ތެރޭގައި ހިމަނާފައިވެއެވެ.