'ފަލަސްޠީނާއެކު ދިވެހީން'ގެ ނަމުގައި އިއްޔެ ކުރިޔަށް ގެންދިޔަ ޓެލެތޯނަށް 14.8 މިލިޔަން ރުފިޔާ ލިބިފަިއވާ ކަމުގައި ޕީއެސްއެމްއިން ހާމަކޮށްފިއެވެ.

ޕީއެސްއެމްއިން ހާމަކޮށްފައިވާ ގޮތުގައި، އެއަދަދަކީ، ރޭގެ މެންދަމު 1:15 އާއި ހަމައަށް ލިބުނު ފައިސާއެވެ. މިޓެލެތޯނުގައި އޮންލައިން ބޭންކް ޓްރާންސްފަރ އިން ފައިސާ ހަދިޔާ ކުރުމަށާއި، އަދި ފަންޑު ފޮށިތަކަށް ފައިސާ ހަދިޔާކުރުމަށް ހުޅުވާލާފައިވެއެވެ.

ޕީއެސްއެމްއިން ބުނީ، ފަންޑުފޮށިތަކުން، 723،948ރ. އާއި 1343 ޑޮލަރާއި 81 ޔޫރޯ ލިބިފައިވާ ކަމަށެވެ.

މީގެ އިތުރުން، ބޭންކް ޓްރާންސްފާ މެދުވެރިކޮށް 6.8 މިލިއަން ދިވެހި ރުފިޔާ އާއި، 33950 ޑޮލަރު އެކައުންޓަށް ޖަމާކޮށްފައިވާ ކަމުގައިވެސް ޕީއެސްއެމްއިން ބުނެފައިވެއެވެ. މީގެ އިތުރުން ކުންފުނިތަކާއި އޮފީސްތަކުން އަދި ވިޔަފާރިތަކުން ފަންޑަށް އެހީގޮތުގައި ދިންފައިސާ ހިމެނެއެވެ.

ޕީއެސްއެމްއިން ބުނީ، ބޭންކް ޓްރަންސްފަރ މެދުވެރިކޮށް ފަންޑަށް ފައިސާ ޖަމާކުރުމަށް މިއަދު އިރު އޮއްސި 6:00 އާއި ހަމައަށް ފުރުޞަތު އޮންނާނެ ކަމަށެވެ.

'ފަލަސްޠީނާއެކު ދިވެހީން'ގެ ނަމުގައި އިއްޔެ ކުރިޔަށް ގެންދިޔަ ޓެލެތޯނަށް ވަރަށް ބޮޑު ތަރުޙީބެއް ލިބިފައިވާކަން ޕީއެސްއެމްއިން ފާހަގަކޮށްފައިވެއެވެ.