ޖުޑީޝަލް ސަރވިސް ކޮމިޝަންގެ މެމްބަރު ކަމަށް،  ރައްޔިތުންގެ މަޖިލީހުގެ މާފުށީ ދާއިރާގެ މެންބަރު ހުސައިން ރިޒާ އާދަމް ހޮވައިފިއެވެ.

ރިޒާ އެމަޤާމަށް އިންތިޚާބުކޮށްފައިވާ ކަން، ޖުޑީޝަލް ސަރވިސް ކޮމިޝަނުން ހާމަކުރީ އިއްޔެއެވެ.

ރިޒާއަކީ، ޖުޑީޝަލް ސަރވިސް ކޮމިޝަނަށް ރައްޔިތުންގެ މަޖިލީހުގެ މެމްބަރުންގެ ތެރެއިން ޢައްޔަނުކުރައްވާފަިއވާ މެމްބަރެވެ. މީގެ އިތުރުން ރައްޔިތުންގެ މަޖިލީހުގެ ރައީސްގެ ހައިސިއްޔަތުން ފޮނަދޫ ދާއިރާގެ މެމްބަރު ޢަބްދުއްރަޙީމް ޢަބުދުﷲވެސް އެކޮމިޝަނުގައި އިންނަވައެެވެ.

ޖުޑީޝަލް ސަރވިސް ކޮމިޝަނަކީ، ފަނޑިޔާރުންނާއި ގުޅޭ މައްސަލަތައް ބަލައި ފިޔަވަޅު އެޅުމުގެ ބާރު ލިބިފައިވާ ކޮމިޝަނަށް ވާއިރު އެކޮމިޝަންގެ މެޖޯރިޓީ މިހާރު އޮތީ، ސަރުކާރަށް ލިބިފައެވެ. 

ޖޭއެސްއެސްސީގެ ރައީސް ކަމުގެ މަޤާމަށް މެމްބަރު ރިޒާ އިންތިޚާބު ކުރައްވާފައި ވާއިރު، އެމަޤާމުގައި އެންމެ ފަހުން ހުންނެވީ، ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު ޙިސާން ޙުސައިންނެވެ.