ބޮޑުކަންނެލީގެ މަސްވެރި އުޅަނދުތަކުގައި ބެނާތައް ދަމާފައި -- ފޮޓޯ: ނޫން.އެމްވީ
މަސްވެރިން މުޒާހަރާއަށް ނުކުމެއްޖެ
މަސްވެރިންނަށް މަސްކިރުވާފައި ފައިސާ ނުދޭތީއާ ރާއްޖޭގައި ލޭނު މަސްވެރިކަން ކުރުމަށް ހުއްދަ ދިނުމަށް ސަރުކާރުން މަސައްކަތްކުރަމުންދާތީ އެކަމާއި ދެކޮޅަށް މަސްވެރިން އިހްތިޖާޖަށް ނުކުމެއްޖެއެވެ.
މިއަދު ހެނދުނުން ފެށިގެން މަސްވެރިން ޚާއްޞަކޮށް ބޮޑު ކަންނެލީގެ މަސްވެރިކަމުގައި އުޅޭ ފަރާތްތަުން ދަނީ، ސަރުކާރާއި ދެކޮޅަށް ޝުއޫރުފާޅުކޮށް އަޑު އުފުަލަމުންނެވެ. ހުޅުމާލެ ކަންނެލި ޖެޓީގައި އަޅާފައިވާ ހުރިހާ މަސްވެރި އުޅަނދުތަކުގައިވެސް ވަނީ، ޝުއޫރުތައް ފާޅުކޮށް ބެނާ ދަމައި ދިދަތައް ނަގާފައެވެ.
ލޭނު އަޅައިގެން ބޮޑު ކަންނެލީގެ މަސްވެރިކަމުގެ ހުއްދަ ދިނުމާ ގުޅޭގޮތުން ފިޝަރީޒް މިނިސްޓަރީން ދަނީ ބޮޑު ކަންނެލި ޔޫނިއަންގެ އިތުރުން ބޮޑުކަންނެލީގެ މަސްވެރިކަމުގައި އުޅޭ އެހެން ފަރާތްތަކާއި އެކުވެސް މަޝްވަރާކުރަމުންނެވެ. އެހެން ނަމަވެސް ރާއްޖޭގެ ކަނޑުތަކުގައި ލޭނު އަޅައިގެން ބޮޑުކަންނެލީގެ މަސްވެރިކަން ކުރަން ހުއްދަ ދިނުމާއި، ބޮޑު ކަންނެލި ޔޫނިއަންއިން ދެކޮޅެވެ.
މީގެ އިތުރުން މަސްވެރިން ކިރުވާފައިވާ މަހަށް މިހާތަނަށް 80 މިލިޔަން ރުފިޔާ ދޫނުކޮށް އޮތް އިރު މަސްވެރި އާއިލާތައް ނިކަމެތިވެފައިވާ ކަންވެސް މަސްވެރިން ފާހަގަކޮށްފައިވެއެވެ. ބައެއް މަސްވެރި އުޅަނދު ފަހަރުން ބުނެފައިވާ ގޮތުގައި ކިރުވާފައިވާ މަހަށް އެއްގޮތަކަށްވެސް ފައިސާ ނުލިބޭތާ މިހާރު 50 ދުވަސްވެއްޖެއެވެ.
ސަރުކާރުންނާއި މިފްކޯއިން ބުނެފައި ވަނީ މަސްވެރިންނަށް ނުދެވި ހުރި ފައިސާ ދޫކުރުމުގެ މަސައްކަތް މިހަފްތާ ތެރޭގައި ފަށާނެ ކަމަށެވެ.