އެމްޑީޕީގެ މެޖޯރިޓީ އޮތް 19 ވަނަ ރައްޔިތުންގެ މަޖިލީހުން ރުހުން ނުދިން 3 ވަޒީރުންނަށް، ރައްޔިތުންގެ މަޖިލީހުން މިއަދު ރުހުން ދީފިއެވެ.

އެތިން ވަޒީޒުންނަކީ، ބަންޑާރަ ނައިބު އަޙްމަދު އުޝާމާއި، މިނިސްޓަރ އޮފް އިސްލާމިކް އެފެއާޒް، ޑރ. މުޙައްމަދު ޝަހީމް ޢަލީ ސަޢީދާއި، ހައުސިން މިނިސްޓަރ ޑރ. ޢަލީ ޙައިދަރެވެ.

މިއަދު ރައްޔިތުންގެ މަޖިލީހުގައި އެ ވަޒީރުންނަށް ރުހުން އޮތްތޯ ބެލުމަށް ނެގި ވޯޓުގައި، ބަންޑާރަ ނައިބު އަޙްމަދު އުޝާމަށް ރުހުން ދީފައި ވަނީ، ވޯޓުގައި ބައިވެރިވެވަޑައިގެންނެވި މެމްބަރުންގެ އިއްތިފާޤުންނެވެ. އުޝާމަށް ރުހުންދޭން ފެންނަކަމަށް 87 މެމްބަރުން ވޯޓު ދެއްވިއެވެ.

ހައުސިން މިނިސްޓަރ ޑރ. ޢަލީ ޙައިދަރަށް ރުހުން ދޭން ފެންނަކަމަށް ވޯޓު ދެއްވީ، 83 މެމްބަރުންނެވެ. އަދި މިނިސްޓަރ އޮފް އިސްލާމިކް އެފެއާޒް، ޑރ. މުޙައްމަދު ޝަހީމް ޢަލީ ސަޢީދަށް ރުހުންދޭން ފެންނަކަމަށް ވޯޓު ދެއްވީ 81 މެމްބަރުންނެވެ.

ޖެނުއަރީ މަހުގެ 29 ވަނަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ރުހުންދޭން ނުފެންނަކަމަށް، މަޖިލީހުން ފާސްކުރި މި ތިން ވަޒީރުން ހަމަ އެދުވަހު، ރައީސުލްޖުމްހޫރިއްޔާ ވަނީ، އެބޭފުޅުން ކުރިންތިއްބެވި ވުޒާރާތަކަށް އަލުން ޢައްޔަނުކުރައްވާފައެވެ.