މިމަހުގެ 5 ވަނަ ދުވަހު، އއ ތޮއްޑޫގައި މުޒާހަރާކޮށް ހަމަނުޖެހުން ހިންގައި، ތޮއްޑޫ ކައުންސިލް އިދާރާއަށް ގާއުކި މައްސަލައިގައި 8 މީހުން ހައްޔަރުކޮށްފައިވާ ކަމަށް ފުލުހުންގެ އިދާރާއިން ވިދާޅުވެއްޖެއެވެ. 

ފުލުހުންގެ އިދާރާއިން ވިދާޅުވީ، އެމީހުން ހައްޔަރިކޮށްފައި ވަނީ ކޯޓު އަމުރުގެ ދަށުން ކަމަށާއި މައްސަލަ ފުލުހުން ތަޙްޤީޤު ކުރަމުންދާ ކަމަށެވެ.

މި ޖޫން މަހުގެ 5 ވަނަ ދުވަހު ތޮއްޑޫ ކައުންސިލް އިދާރާގެ ކައިރިއަށް މީހުން އެއްވެ މުޒާހަރާކޮށްފައި ވަނީ އެރަށުގެ ދަނޑުވެރިންގެ އަތުން ދަނޑުބިންތައް އަތުލަން އުޅޭ ކަމަށް ބުނެއެވެ. އެދުވަހުގެ މުޒާހަރާގައި، މުޒާހަރާގައި ބައިވެރިވި ބައެއް ފަރާތްތަކުން ވަނީ، ހަމަނުޖެހުން ހިންގައި ތޮއްޑޫ ކައުންސިލް އިދާރާގެ ފުރާޅަށް ގައު އުކާފައެވެ. އަދި ހަމަނުޖެހުންތައް މައިތުރު ކުރުމަށް އުޅުނު ފުލަހަކަށްވެސް އެދުވަހުގެ ހަމަނުޖެހުންތަކުގެ ތެރޭގައި އަނިޔާވެފައިވެއެވެ.