އިންޑިއާގެ ބޮޑުވަޒީރު ނަރެންދުރަ މޯދީ އަދި އިންޑިއާ ސަރުކާރުގެ ކައުންސިލު އޮފް މިނިސްޓަރސް ހުވާކުރެއްވުގެ ރަސްމިއްޔާތަށް ވަޑައިގެންނެވުމަށް އިންޑިއާގެ ބޮޑުވަޒީރު ދެއްވި ދަޢުވަތަކީ، ދެ ޤައުމުގެ ގުޅުން ރަނގަޅު މިސްރާބަކަށް ހުރިކަން ރަމްޒުކޮށްދޭ ކަމެއް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އިންޑިއާ ސަރުކާރުގެ ދައުވަތު، ރައީސް ޑރ. މުޢިއްޒަށް ރައްދުކޮށްދެއްވުމަށްޓަކައި، އިންޑިއާ ސަރުކާރުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރު، އެމަނިކުފާނުގެ އަރިހަށް ކުރެއްވި އިޙްތިރާމްގެ ޒިޔާރަތުގައި ދެބޭފުޅުން ދެއްކެވި ވާހަކަފުޅުގައި ކަމަށް ރައީސުލްޖުމްހޫރިއްުގެ އޮފީހުން ވިދާޅުވެފައިވެއެވެ. މިބައްދަލުކުރެއްވުން އޮތީ ރައީސުލްޖުމްހޫރިއްޔާގެ އޮފީހުގައެވެ.

އިންޑިއާ ސަރުކާރުން ފޮނުއްވެވި ދަޢުވަތު ޤަބޫލުފުޅު ކުރައްވައި، ރައީސުލްޖުމްހޫރިއްޔާ ދެއްކެވި ވާހަކަފުޅުގައި، އިންޑިއާގެ ބޮޑުވަޒީރު މަޤާމުގެ ހުވާކުރެއްވުމުގެ ތާރީޚީ ރަސްމިއްޔާތަށް ވަޑައިގެންނެވުމަކީ އެމަނިކުފާނަށް ލިބިވަޑައިގަންނަވާ ޝަރަފެއްކަން ވަނީ ފާހަގަކުރައްވާފައެވެ. އަދި ދެޤައުމުގެ ދެމެދު އޮންނަ ގާތް ރަހުމަތްތެރި ގުޅުން އިތުރަށް ބަދަހިކުރެއްވުމަށް އެދިވަޑައިގަންނަވާކަމުގައިވެސް ރައީސުލްޖުމްހޫރިއްޔާ ވިދާޅުވި ކަމަށާއި، އަދި ދެޤައުމުގެ ގުޅުން ކުރިޔަށްދަނީ ރަނގަޅު މިސްރާބަށްކަން މި ދަތުރުފުޅުން ރަމްޒުކޮށްދޭކަމުގައި އެމަނިކުފާނުގެ ވާހަކަފުޅުގައި ފާހަގަކުރައްވާފައިވާ ކަމުގައިވެސް ރައީސުލްޖުމްހޫރިއްޔާގެ އޮފީހުން ވިދާޅުވެފައިވެއެވެ.

އިންޑިއާގެ ބޮޑުވަޒީރު ނަރެންދުރަ މޯދީ އަދި އިންޑިއާ ސަރުކާރުގެ ކައުންސިލު އޮފް މިނިސްޓަރސް ހުވާކުރެއްވުގެ ރަސްމިއްޔާތަށް ވަޑައިގެންނެވުމަށް އިންޑިއާގެ ބޮޑުވަޒީރު ވަނީ ރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިތުރުން، ދުނިޔޭގެ އެހެން ޤައުމުތަކުގެ ވެރިންނާއި ލީޑަރުންނަށްވެސް މިދަޢުވަތު ފޮނުއްވާފައެވެ/

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމަށް ވަޑައިގެންނެވުމަށް ކުރެއްވި ކެމްޕޭންތަކުގައި އިންޑިއާ އާި ދެކޮޅު ވާހަކަފުޅުތައް ދެއްކެވި އިރު، އޭގެ ކުރިން ޕީޕީއެމްއިން ހިންގި އިންޑިއާ އަައުޓް ހަރަކާތުގައިވެސް އެމަނިކުފާނު ޢަމަލީ ގޮތުން ބައިވެރިވެވަޑައިގެންނެވިއެވެ. އަދި އެމަނިކުފާނުގެ ސަރުކާރުގެ ނައިބު ވަޒީރުންގެ މަޤާމަށް ޢައްޔަނުކުރައްވާފައިވާ 3 ބޭފުޅަކު، އިންޑިއާގެ ބޮޑުވަޒީރަށް ކުޑައިމީސްވާގޮތަށް ސޯޝަލްމީޑިއާގައި ވާހަކަދައްކާފައިވެއެވެ.

މިކަންކަމާއި ގުޅިގެން ދިވެހިރާއްޖެއާ އިންޑިއާ އާއި ދެމެދު އޮތް ޒަމާންވީ ގުޅުންތައް ވަރަށް ބޮޑަށް ގޯސްވެެގެން ގޮސްފައިވެއެވެ. އަދި މިއަހަރުގެ ކުރީކޮޅުން ފެށިގެން ރާއްޖޭގެ ޓުއަރިޒަމް ބޮއިކޮޓް ކުރުމުގެ ހަރަކާތްތަކެއްވެސް އިންޑިއާގައި ކުރިޔަށް ގެންގޮސްފައިވެއެވެ.