ސަރުކާރުގެ ހަރަދުގައި މިއަހަރު ހައްޖަށް ފޮނުއްުވުމަށް ކަނޑައެޅި މީހުންގެ ތެރެއިން 48 މީހުންނާއިއެކު، މޯލްޑިވްސް ހައްޖު ކޯޕަރޭޝަންގެ ހަވާލުގައި މިއަހަރު ހައްޖުގެ އަޅުކަމަށް ފުރާ އެންމެ ފަހު ގުރޫޕްގެ މީހުން މިއަދު ފުރައިފިއެވެ.

މި ރިޔާސީ ދައުރުގެ ތެރޭގައި ސަރުކާރުގެ ޚަރަދުގައި 1000 މީހުން ހައްޖަށް ފޮނުއްވައި ދެއްވުމަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެކެވެ. މިގޮތުން ސަރުކާރުން ހައްޖަށް ފޮނުއްވައިދޭނެ މީހުން ހޮވަނީ، ހައްޖަށް ދިޔުމުގެ ކެރިފޯރުންތެރިކަން ނެތް މީހުންގެ ތެރެއިން ފަޤީރުންގެ ލިސްޓުގަިއ ހިމެނިފައިވާ މީހުންގެ ތެރެއިންނެވެ.

މިއަހަރު 50 މީހުން ހައްޖަށް ފޮނުއްވާފައިވާ އިރު، އޭގެ ތެރެއިން 2 މީހަކު ވަނީ، ކުރިން މައްކާއަށް ގޮސްފައެވެ. އިސްލާމިކް މިނިސްޓްރީން ހާމަކޮށްފައިވާގޮތުގައި، ފަޤީރުންގެ ގޮތުގައި ރަޖިސްޓްރީވެފައިވާ މީހުންގެ ތެރެއިން، 667 މީހުންނަކީ، ސަރުކާރުގެ ޚަރަދުގައި ހައްޖަށް ފޮނުވުމަށް ކަނޑައެޅި ޝަރުޠުތައް ފުރިހަމަވާ މީހުންނެވެ.

ސަޢޫދީ އަރަބިއްޔާއިން މިއަހަރު ރާއްޖެއަށް ދޫކޮށްފައިވަނީ، 1000 ހައްޖު ކޯޓާއެވެ. ހައްޖަށް ދިޔަ މީހުންގެ ތެރެއިން އެހީތެރިން ނުލައި 980 މީހަކު މިހާރު ވަނީ، ރާއްޖެއިން ހައްޖަށް ގޮސްފައެވެ.