Advertisement
ރައީސުލްޖުމްހޫރިއްޔާގެ ކެމްޕޭން ދަތުރުފުޅުގެ ތެރެއިން ---
ދެއަތޮޅަކަށް ރައީސް ކުރެއްވި ކެމްޕޭން ދަތުރުފުޅު ނިންމަވާލައްަވައިފި
ދެއަތޮޅަކަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ކުރެއްވި ކެމްޕޭން ދަތުރުފުޅު ހޯމަދުވަހު ނިންމަވާލެއްވުމަށްފަހު އެނބުރި މާލެ ވަޑައިގެންފިއެވެ.
"އުފާވެރި އަމާންރާއްޖެ" ކެމްޕޭން ދަތުރުފުޅުގައި ހޮނިހިރު ދުވަހު ރައީސުލްޖުމްހޫރިއްޔާ އެންމެ ފުރަތަމަ ވަޑައިގެންނެވީ، މުލަކަތޮޅު ކޮޅުފުއްޓަށެވެ. އަދި މިދަތުރުފުޅުގައި ރައީސުލްޖުމްހޫރިއްޔާ ވަނީ، މުލަކަތޮޅުގެ މީހުން ދިރިއުޅޭ ހުރިހާ ރަށަކަށް ވަޑައިގެންފައެވެ.
މުލަކަތޮޅަށްފަހު ރައީސުލްޖުމްހޫރިއްޔާ ފެލިދެ އަތޮޅަށް ވަޑައިގެންނެވީ ހޯމަ ދުވަހުގައެވެ. ރައީސުލްޖުމްހޫރިއްޔާ ވަނީ، ވ.އަތޮޅުގެ މީހުން ދިރިއުޅޭ ހުރިހާ ރަށަކަށް ވަޑައިގެން އެރަށްރަށުގައިވެސް ކެމްޕޭން ޖަލްސާތަކުގައި ބައިވެރިވެވަޑައިގެންފައެވެ. އަދި މިދެއަތޮޅުގެ ރަށްރަށުގެ ރައްޔިތުންނާއި އެމްޑީޕީގެ ސަޕޯޓަރުންގެ ފަރާތުން ރައީސުލްޖުމްހޫރިއްޔާއަށް ހޫނު މަރުޙަބާއެއް ދަންނަވާފައިވެއެވެ.
ރައީސުލްޖުމްހޫރިއްޔާގެ މިދަތުރުފުޅުގެ ތެރެއިން ވަނީ، މުލަކަތޮޅާއި ފެލިދެ އަތޮޅުގައި މިސަރުކާރުން ހިންގައި ނިމިފައިވާ މަޝްރޫޢުތަކުގެ ޚިދުމަތްތައް އިފްތިތާޙްކޮށްދެއްވައި، އިމާރާތްތަކާއި ބަނދަރުތައް ހުޅުއްވައި ދެއްވާފައެވެ.
ދެއަތޮޅަކަށް ކުރެއްވި ކެމްޕޭން ދަތުރުފުޅު ނިންމަވާލެއްވުމަށްފަހުގައި، ރައީސުލްޖުމްހޫރިއްޔާ މާލެ ވަޑައިގެންނެވީ، ހޯމަދުވަހުގެ ހަވީރުއެވެ.
