ހިއުމަން ރައިޓްސް ކޮމިޝަން އޮފް ދަ މޯލްޑިވްސްގެ މެންބަރުކަމުގެ މަގާމު ހުސްވެފައިވާތީ، އެ ކޮމިޝަނަށް މެންބަރަކު ޢައްޔަންކުރެއްވުމަށްޓަކައި މެންބަރުކަމުގެ މަގާމަށް ކުރިމަތިލުމުގެ ފުރުޞަތު، ރައީސުލްޖުމްހޫރިއްޔާގެ އޮފީހުން މިއަދު ހުޅުވާލައްވައިފިއެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ، ހިއުމަން ރައިޓްސް ކޮމިޝަނުގެ މެންބަރުކަމުގެ ފޯމު ބަލައިގަތުމަށް ހަމަޖެހިފައިވަނީ، 2024 ޖޫން 30 ވަނަ ދުވަހު ހެނދުނު 08:30 އިން މެންދުރުފަހު 12:30 އަށް، އެއޮފީހުން ކަމަށެވެ. އަދި އެ ކޮމިޝަނުގެ މެންބަރުކަމަށް ކުރިމަތިލުމަށް އެދޭ ފޯމު ރައީސުލްޖުމްހޫރިއްޔާގެ އޮފީހުގެ ވެބްސައިޓުން ޑައުންލޯޑް ކުރެއްވޭނެ ކަމުގައިވެސް އެއޮފީހުން ވިދާޅުވިއެވެ.

އެކޮމިޝަންގެ މެމްބަރު ކަމުގެ މަޤާމު ހުސްވީ ކޮމިޝަންގެ މެމްބަރު އަދި ނައިބު ރައީސް ޑރ. އަޙްމަދު އަދުހަމް ޢަބްދުﷲ އިސްތިޢުފާދެއްވުމާއި ގުޅިގެންނެވެ.

އެޗްއާރްސީއެމްގެ މެމްބަރުކަމަށް ކުރިމަތިލުމަށް، ރައީސުލްޖުމްހޫރިއްޔާގެ އޮފީހުން ހުޅުވާލި މިއީ ދެވަނަ ފަހަރެވެ. 

އެޗްއާރްސީއެމްގައި ޖުމުލަ 5 މެމްބަރުން ތިއްބަވާއިރު، މިހާރު އެކޮމިޝަންގައި ތިއްބެވީ 4 މެމްބަރުންނެވެ. އެއީ ކޮމިޝަންގެ ރައީސް މަރްޔަމް މުނާ އާއި ކޮމިޝަންގެ މެމްބަރުން ކަމުގައިވާ، މުއުމިނާ ވަޙީދާއި، އާމިނަތު ޝިފާޢަތު ޢަބްދުއްރައްޒާޤާއި، އަލްއުސްތާޛާ ސަމާޢު އަޙްމަދު ނަޖީބެވެ.