ރައްޔިތުންގެ މަޖިލީހުގެ މާލިއްޔަތު ކޮމިޓީގެ މުގައްރިރަކަށް، ރައްޔިތުންގެ މަޖިލީހަށް ޖުމްހޫރީ ޕާޓީން ހޮވުނު ހަމައެކަނި މެމްބަރު، ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ޤާސިމް އިބްރާހީމް ހޮވައިފިއެވެ.

ޤާސިމް އިބްރާހީމް މާލިއްޔަތު ކޮމިޓީގެ މުގައްރިރަކަށް ހޮއްވަވާފައި ވާއިރު، އެކޮމެޓީގެ ނައިބު މުގައްރިރަކަށް ހޮވާފައި ވަނީ، ރައްޔިތުންގެ މަޖިލީހުގެ އޭދަފުށީ ދާއިރާގެ، ޕީއެންސީގެ މެމްބަރު ޢަޙްމަދު ސަލީމެވެ. މާލިއްޔަތު ކޮމިޓީގައި، 11 މެމްބަރުން ތިއްބަވާއިރު އެކޮމިޓީގެ މެޖޯރިޓީވެސް އޮތީ ސަރުކާރު ހިންގާ ޕާޓީ ޕީއެންސީއަށެވެ. އެކޮމިޓީގައި ހިމެނިވަޑައި ގަންނަވަނީ، ޖުމްހޫރީ ޕާޓީގެ މެމްބަރަކާއި އެމް.ޑީ.ޕީގެ ދެ މެމްބަރުންނާއި، ސަރުކާރު ހިންގާޕާޓީ ޕީއެންސީގެ 8 މެމްބަރުންނެވެ.

މާލިއްޔަތު ކޮމިޓީގެ މެމްބަރުން:

މުޤައްރިރު- ޤާސިމް އިބްރާހިމް (ޖުމްހޫރީ ޕާޓީ)

ނައިބު މުޤައްރިރު - އަޙްމަދު ސަލީމް (ޕީ.އެން.ސީ)

ކޮމިޓީ މެމްބަރުން:

އަޙްމަދު ނާޒިމް ( މަޖިލީހުގެ ނައިބު ރައީސް - ޕީ.އެން.ސީ)

އިބްރާހީމް ޝުޖާއު (ޕީ.އެން.ސީ)

ޢަބްދުالله ޝަރީފް (ޕީ.އެން.ސީ)

މުޙައްމަދު މަމްދޫހު (ޕީ.އެން.ސީ)

އަސަދުالله ޝިހާބު (ޕީ.އެން.ސީ)

އަޙްމަދު އަޒާން (ޕީ.އެން.ސީ)

ހަމަދު އަބްދުالله (ޕީ.އެން.ސީ)

އަބްދުލްޣަފޫރު މޫސާ  (އެމް.ޑީ.ޕީ)

ޑރ. އަޙްމަދު ޝަމްހީދު - (އެމް.ޑީ.ޕީ)

ރައްޔިތުންގެ މަޖިލީހުގެ މާލިއްޔަތު ކޮމިޓީއަކީ ރައްޔިތުންގެ މަޖިލީހުގައި ހިމެނޭ ދާއިމީ ކޮމިޓީތަކުގެ ތެެރެއިން އެންމެ މުހިއްމު އެއް ކޮމިޓީއެވެ. ސަރުކާރުން ރައްޔިތުންގެ މަޖިލީހަށް ހުށައަޅާ ދައުލަތުގެ ބަޖެޓު ދިރާސާކޮށް ބަޖެޓަށް ގެންނަންޖެހޭ ބަދަލުތައް ގެންނާނީ މި ކޮމިޓީގައެވެ. އަތޮޅުތަކުގެ ރަށްރަށުގެ ތަރައްޤީއަށް ރާވާ، ޕީއެސްއައިޕީ މަޝްރޫޢުތައް ދައުލަތުގެ ބަޖެޓުގައި ހިމެނުގައި އެންމެ މުހިއްމު ދައުރެއް އަދާކުރަނީ މިކޮމިޓީގައެވެ.