Advertisement
ކޯޕްރަލް މުޙައްމަދު ޒައިދާންގެ ޖަނާޒާގެ ތެރެއިން ---
އަސްކަރީ ރަސްމީ އިއްޒަތުގައި ޒައިދާންގެ ޖަނާޒާ ބާއްވައިފި
އެމްއެންޑީއެފް ސެންޓްރަލް އޭރިއާ ކޮމާންޑް، ލ.ކައްދޫގައި އަސްކަރީ ތަމްރީނެއް ފުރިހަމަކުރަމުން ދަނިކޮށް ނިޔާވި ކޯޕްރަލް މުޙައްމަދު ޒައިދާންގެ ޖަނާޒާ ރަސްމީ ޢިއްޒަތުގައި މިއަދު ހަވީރު ބާއްވައިފިއެވެ.
ޒައިދާންގެ ޖަނާޒާ ބާއްވާފައި ވަނީ އޭނާގެ އުފަން ރަށް، ރ. އުނގޫފާރުގައި މިއަދުގެ ޢަސުރު ނަމާދަށްފަހުގައެވެ.
ކޯޕްރަލް މުޙައްމަދު ޒައިދާންގެ ޖަނާޒާ ބާއްވާފައި ވަނީ ރަސްމީ ޢިއްޒަތުގެ ދެވަނަ ދަރަޖައިގައި ކަމަށާއި، މިޖަނާޒާގައި ސިފައިން ހަތް ބަޑީގެ ސަލާމެއް ވަނީ އަރުވާފައި ކަމުގައި އެމްއެންޑީއެފުން ވިދާޅުވިއެވެ.
ކޯޕްރަލް މުޙައްމަދު ޒައިދާން ނިޔާވެފައިވަނީ، ސިފައިންގެ ހައި ރިސްކް ތަމްރީނެއް ފުރިހަމަ ކުރަމުން ދަނިކޮށް، މި މަހުގެ 2 ވަނަ ދުވަހު ލ.މާވަށްކައިރީ ކަނޑުގެ ސަރަހައްދުގައި ހިނގި ހާދިސާއެއްގައި، ލިބުނު އަނިޔާތަކަށް ފަރުވާދެމުން ދަނިކޮށް ލ.ގަން ރީޖަނަލް ހޮޮސްޕިޓަލްގައެވެ.
ކޯޕްރަލް މުޙައްމަދު ޒައިދާން ނިޔާވުމާއި ގުޅިގެން އެކަމުގެ ހިތާމައިގައި، މިއަދުން ފެށިގެން ދެ ދުވަސް ވަންދެން ސިފައިންގެ ދިދަ، ސިފައިންގެ މަރުކަޒުތަކުގައި ވަނީ ބައި ދަނޑިއަށް ތިރިކޮށްފައި ކަމުގައިވެސް އެމްއެންޑީއެފުން ވިދާޅުވިއެވެ.
