ރައްޔިތުންގެ މަޖިލީހުގެ މެމްބަރުންގެ ތެރެއިން ޖޭއެސްސީއަށް ކަނޑައަޅާ މެމްބަރުގެ ގޮތުގައި އެކޮމިޝަނަށް ޢައްޔަނު ކުރުމަށް، ރައްޔިތުންގެ މަޖިލީހުގެ މާފުށީ ދާއިރާގެ މެންބަރު ހުސައިން ރިޒާ އާދަމްއަށް ރައްޔިތުންގެ މަޖިލީހުން މިއަދު ރުހުންދީފިއެވެ.

މެމްބަރު ރިޒާ އެމަޤާމަށް ޢައްޔަނު ކުރުމަށް ރައްޔިތުންގެ މަޖިލީހުގެ މިއަދުގެ ޖަލްސާގައި ފާސްކޮށްަފައި ވަނީ، 83 މެމްބަރުންގެ އިއްތިފާޤުންނެވެ.

މެމްބަރު ހުސައިން ރިޒާގެ ބޭބެ، އިބްރާހީމް ރިޒާއަކީވެސް 18 ވަނަ ރައްޔިތުންގެ މަޖިލީހުން އެކޮމިޝަނަށް ކަނޑައެޅުއްވި މެމްބަރުގެ ގޮތުގައި އެމަޤާމު ފުރުއްވާފައިވާ ބޭފުޅެކެވެ. ރައްޔިތުންގެ މަޖިލީހުގެ ގުރައިދޫ ދާއިރާގެ މެމްބަރު އިބްރާހީމް ރިޟާ އަވަހާރަވީ، ހުސްވިއަހަރުގެ ފެބުރުއަރީ މަހުގައެވެ.

ޖުޑީޝަލް ސަރވިސް ކޮމިޝަންގެ މެމްބަރުކަމަށް ރައްޔިތުންގ މަޖިލީހުން ކަނޑައަޅާ މެމްބަރުގެ ގޮތުގައި، މެންބަރު ހުސައިން ރިޒާ އާދަމަށް ރައްޔިތުންގެ މަޖިލީހުން ރުހުންދެއްވި ނަމަވެސް އޭނާ އެމަޤާމަށް ޢައްޔަނުކުރައްވާނީ ރައީސުލްޖުމްހޫރިއްޔާއެވެ. ކޮމިޝަން އެކުލެވިގެންވާ ގޮތަށް ބަލާއިރު، އެކޮމިޝަނުގައި ރައްޔިތުންގެ މަޖިލީހުގެ ރައީސާއި، މަޖިލީހުން ކަނޑައަޅުއްވާ މެމްބަރަކާއި، ރައީސުލްޖުމްހޫރިއްޔާ ޢައްޔަނުކުރައްވާ މެންބަރަކާއި، ބަންޑާރަ ނައިބު ހިމެނިވަޑައިގަންނަވާއިރު، ކޮމިޝަންގެ މެޖޯރިޓީ ލިބެނީ، ސަރުކާރު ހިންގާޕާޓީ ޕީއެންސީއަށެވެ.