މާލެއިން މުދާ ބަރުކޮށްގެން ށ. އަތޮޅަށް ދަތުރުކުރި، "އުޅިއަށި ބޯޓު" ބިލަތްފަހީ، ނެރުފައިކަށީގައި ޖެހި، ބަނދަރުތެރެއަށް އަޑިޔަށް ހިނގައްޖެއެވެ.

އެމްްއެންޑީއެފުން ވިދާޅުވީ، މިހާދިސާ ހިނގީ އެބޯޓު ބިލަތްފަހީ ބަނދަރަށް ވަންނަން އުޅުމުގެ ތެރޭގައި ހިލަ ތޮށީގައި ޖެހި ފަޅައިގެން ދިޔުމުގެ ސަބަބުން ކަމަށެވެ. އަދި އެބޯޓަށް އެހީތެރިކަން ފޯރުކޮށް ދިނުމަށް، ކުޅުދުއްފުށީގައި ޤާއިމްވެ ތިބޭ ސިފައިން އެރަށަށް ގޮސްފައިވާ ކަމުގައި އެމްއެންޑީއެފުން ވިދާޅުވިއެވެ.

ހާދިސާގައި ބޯޓަށާިއ މުދަލަށް ބޮޑެތި ގެއްލުންތަކެއް ލިބުނު ނަމަވެސް ބޯޓުން ދަތުރު ކުރި އެއްވެސް މީހަކަށް ގެއްލުމެއް ލިބިފައެއް ނުވެއެވެ.

އުޅިއަށި ބޯޓަކީ، ށ. އަތޮޅުގެ ފަސް ރަށަކަށް މުދާ އުފުލާ ބޮޑު ބޯޓެއް ކަމަށް ވާތީ، އެބޯޓު އަޑިޔަށް ދިޔައިރު، ބޯޓުގައި ގިނައަދަދެއްގެ ވިޔަފާރި މުދަލާއި، ކާޑުގެ ބާވަތްތައް ހުއްޓެވެ. ބޯޓުގެ ފަލްކާތަކުގައި ހުރި އެއްވެސް އެއްޗެއް ސަލާމަތް ނުކުރެވި ވަނީ އަޑިޔަށް ގޮސްފައެވެ.

ބޯޓުން މުދާ ސަލާމަތް ކުރުމުގެ މަސައްކަތާއި ބޯޓު ފެންމައްޗަށް ނެގުމުގެ މަސަކަތް ބިލަތްފަހީގެ ރައްޔިތުންނާއި އަތޮޅުގެ އެހެން ރަށްރަށުގެ ރައްޔިތުންނާއި ކަމާއި ގުޅުންހުރި މުއައްސަސާތަކުން މިހާރު ދަނީ ކުރަމުންނެވެ.