މޯލްޑިވްސް ނެޝަނަލް ޑިފެންސް ފޯސް، (އެމްއެންޑީއެފް) އިން ކަނޑުމަތީގައި ކުރިޔަށް ގެންދިޔަ ތަމްރީނެއްގެ ތެރެއިން މިޔަރެއް ހަމަލާދިނުމުގެ ސަބަބުން ނިޔާވި، ރ. އުނގޫފާރު ނިއުލައިފް، މުހައްމަދު ޒައިދާން (24އ)ގެ ޖަނާޒާ ބޭއްވުމަށް އޭނާގެ ހަށިގަނޑު މިއަދު އުނގޫފާރަށް ގެންގޮސްފިއެވެ.

ސިފައިންގެ ޚިދުމަތުގައި ނިޔާވާ އޮފިސަރުންނަށް އަރުވާ ސިފައިންގެ ޢިއްޒަތުގައި، ޒައިދާންގެ ޖަނާޒާގެ ކަންކަން ކުރިޔަށް ގެންދިޔުމަށް އެމްއެންޑީއެފުން ވަނީ ނިންމާފައެވެ.

އުނގޫފާރުން މައުލޫމާތު ލިބިފައިވާ ގޮތުގައި، ކަށުކަމާއި ކެމީގެ ކަންކަމަށް ފަހުގައި މޫނު ދެއްކުން ކުރިޔަށް ދާނީ، އުނގޫފާރު އިސްލާމީ މަރުކަޒުގައެވެ. މޫނުދެއްކުން އޮންނާނީ މިއަދުގެ މެންދުރު ފަހު 13:00 އިން 15:00އަށެވެ. އަދި ޒައިދާންގެ މައްޗަށް ކަށުނަމާދު ކުރުން އޮންނާނީ މިއަދުގެ އަސުރު ނަމާދަށް ފަހު، އުނގޫފާރު އިސްލާމީ މަރުކަޒުގައެވެ. 

ސިފައިންގެ ޚިދުމަތުގައި ނިޔާވާ ސިފައިންގެ ބޭކަލުންނަށް އިޙްތިރާމް އަދާކުރުމުގެ ގޮތުން، އަރުވާ 7 ބަޑީގެ ސަލާމް އެރުވުންވެސް އޮންނާނެއެވެ.

ސިފައިންގެ ތަމްރީންތައް ހަދަމުން ދިޔަ، ޒައިދާން ނިޔާވީ، ލ. މާވަށް ބޭރުން ކަނޑުގެ ސަރަހައްދުގައި ސިފައިން ކުރިއަށް ގެންދިޔަ ތަމްރީނުގައި އުޅެނިކޮށް މިޔަރެއް އޭނާއަށް ހަަމަލާދިނުމުގެ ސަބަބުން، ލިބުނު ޒަޚަމްތަކަށް ގަން ރީޖަނަލް ހޮސްޕިޓަލުގައި ފަރުވާ ދެމުން ދަނިކޮށެވެ. ޒައިދާން ނިޔާވީ މިޔަރުގެ ހަމަލާގައި އޭނާގެ ފަޔަށް ލިބުނު ޒަޚަމްތަކާއި އެކު ލޭމަނާ ނުކުރެވިގެން ކަމުގައި ބައެއް މަސްދަރުތަކުން ބުނެފައިވެއެވެ.