ސިފައިންގެ އަަސްކަރީ މަރުކަޒު، ރީޖަނަލް ހެޑް ކުއަޓަރޒް، ކައްދޫގައި، ސިފައިންގެ ތަމްރީންތައް ހަދަމުން ދިޔަ ޒުވާނަކަށް، މިޔަރެއް ހަމަލާދިނުމާއި ގުޅިގެން ލިބުނު ޒަޚަމްތަކަށް ފަރުވާދެމުން ދަނިކޮށް ނިޔާވެއްޖެއެވެ.

މައުލޫމާތު ލިބިފައިވާ ގޮތުގައި މިއަދު މެންދުރު އެޒުވާނާއަަށް މިޔަރެއް ހަމަލާދީފައި ވަނީ، މޫދުގެ ތަމްރީންތަކުގައި މޫދުގައި އުޅެނިކޮށެވެ. މިޔަރުގެ ހަމަލާގައި އޭނާގެ ފައި ވަރަށް ބޮޑަށް ޒަޚަމްވިކަމަށް އެނގިފައިވެއެވެ.

އެމްއެންޑީއެފުން ވިދާާޅުވީ، މިހާދިސާގައި ނިޔާވެފައި ވަނީ ސިފައިންގެ ތަމްރީންތައް ހަދަމުންދިޔަ، ރ. އުނގޫފާރު ނިއުލައިފް، މުހައްމަދު ޒައިދާން (24އ) ކަމަށެވެ. އޭނާ ނިޔާވީ، ގަން ރީޖަނަލް ހޮސްޕިޓަލުގައި ފަރުވާ ދެމުން ދަނިކޮށެވެ.

އެމްއެންޑީއެފުން ވިދާޅުވީ، މިހާދިސާ ހިނގީ، ލ.ކައްދޫގައި މިވަގުތު ކުރިއަށްދާ ސިފައިންގެ ތަމްރީނެއްގެ ތެރެއިން ލ.މާވަށް ކައިރީ މޫދުގައި ތަމްރީނުގެ ބައެއް ކުރިއަށްދަނިކޮށް ކަމަށެވެ.

ރާއްޖޭގައި މިފަހުގެ ތާރީޚެއްގައި މިޔަރުގެ ހަމަލާއެއްގައި މީހަކު ނިޔާވި މިއީ ފުރަތަމަ ފަހަރުކަމަށް ބެލެވިފައިވެއެވެ.