މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަޙްޤީޤު ކުރުމަށް، ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވެރިކަމުގެ ހުވާކުރެއްވި ދުވަހު އުފެއްދެވި، ކޮމިޝަން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު އުވާލައްވައިފިއެވެ.

އެކޮމިޝަން އުފައްދަވާފައި ވަނީ 17 ނޮވެމްބަރު 2018 ވީ ހޮނިހިރު ދުވަހުގައެވެ. އެކޮމިޝަން އުވާލައްވައި ރައީސުލްޖުމްހޫރިއްޔާ މިއަދު ނެރުއްވި ޤަރާރުގައި ވިދާޅުވެފައި ވަނީ، އެކޮމިޝަން އުވާލެއްވީ، އެކޮމިޝަނާއި މަތިކޮށްފައިވާ މަސައްކަތްތައް އެކޮމިޝަނުން ނިންމާފައި ވާތީ ކަމަށެވެ.

މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބެލުމަށް ރައީސް ޞާލިޙް އުފެއްދި އެކޮމިޝަނުން، މައިގަނޑުގޮތެއްގައި ބަލައި ނިންމި މައްސަލަތަކުގެ ތެރޭގައި، ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު ޑރ. އަފްރާޝީމް ޢަލީގެ މަރުގެ މައްސަލައާއި، ވަގަށް ނަގައި މަރާލި މިނިވަން ނޫހުގެ ނޫސްވެރިޔާ އަޙްމަދު ރިޟުވާނުގެ މަރުގެ މައްސަލަ އާއި، ރިޟުވާނުގެ އެކުވެރިޔާ އަދި ބްލޮގަރ ޔާމީން ރަޝީދު މަރާލި މައްސަލަ ހިމެނެއެވެ. އޭގެ އިތުރުންވެސް ބައެއް މަރުތަކުގެ މައްސަލަ އާއި ގެއްލިފައިވާ މީހުންގެ މައްސަލަތައް އެކޮމިޝަނުން ބަލާފައިވެއެވެ.

ރިޟުވާނު ވަގަށް ނަގައި މަރާލުމާއި، އަދި ޔާމީން ރަޝީދު މަރާލުމުގައި އަމަލީ ގޮތުންނާއި އެނޫން ގޮތްގޮތުންވެސް ބައިވެރިވެފައިވާ ކަމަށް ކޮމިޝަންގެ ރިޕޯޓުގައި ފާހަގަކޮށްފައިވާ ބައެއް މީހުންނަށް މިސަރުކާރުގެ އިސް މަޤާމުތައް ދީފައިވެއެވެ.

މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަޙްޤީޤު ކުރުމަށް ރައީސް ޞާލިޙް އުފެއްދި އެކޮމިޝަންގެ މަސައްކަތްތައް އެކަށީގެންވާ ބާރު ސްޕީޑެއްގައި ކުރިޔަށް ނުދިޔަކަމަށް ބުނެ އާއްމު ބައެއް ފަރާތްތަކުންނާއި، މައްސަލަތައް ނިސްބަތްވާ އާއިލާތަކުންވެސް ފާޑު ކިޔާފައިވެއެވެ.